尋日恒指高低波幅得一百點，最終收市僅升0.46點，但二、三線股不乏炒作，繼前日炒起AH差價股後，尋日又輪到醫藥、電力同細價殼股異動，唔太貪心，即市小注跟炒都搵到餐晏仔！

建築股每年生意額雖大，但利潤卻有限，板塊估值低實有原因。（資料圖片）

位列主板升幅榜首乃剛復牌的俊和（00711），全日高位見0.9元，收報0.89元，升71%，成交1.12億元，股價升咗七成，市值才9.6億元，公司披露大股東就可能出售全部或部分股權與獨立第三者簽訂諒解備忘錄。

俊和乃本港建築界老大哥，在業界地位舉足輕重，創辦人彭錦俊一○年辭世後由第二代全面接手，沒料到僅數年後便洽賣盤，最終控股權會落入內地抑或本地同業手中，就要拭目以待！

俊和易手掀尋寶熱

一直以來，建築股估值比地產股更低，市帳率普遍得0.4至0.6倍。如今俊和能唔能夠借易主消息炒番上NAV1.57元，不得而知，但眼見又一家本地成功企業可能易主，倒令阿莊不勝唏噓。

事實上，建築股每年生意額大，但利潤卻有限，加上近年建築成本有加冇減，真係生意難做，板塊估值低實有其原因。建築業聘用大量勞工，站在生意經角度行業風光不再。同類股中，新昌營造（00404）早前亦已引入天津市國企為主要股東。也許靠中企接手打救，取本港經驗，拓內地市場，各展所長，不失為出路。

提到建築股，阿莊想起隻有利集團（00406），現價1.62元，NAV約每股3.5元。除建築業務外，公司位於土瓜灣的住宅發展項目料於明年中或更早時間完工，上月公司業績報告披露，項目尚待取得預售批准，已開始制定銷售安排。若年內順利啟動預售，明年落成並可將銷售收益入帳，計落現價估值吸引。不過，公司暫缺重大消息，股份交投疏落，策略僅可持少量貨坐定定等運到！

想刀仔鋸大樹玩細價殼股尋寶遊戲者，可從報價機找出市值低於三億元的主板股份，並在當中的交投異動股尋找明日之升。尋日就見隻品質（00243）成交急增至878萬元，收報0.38元，升10%，市值才2.9億元。未見公司有新消息，純當殼炒機會較高，大股東持股38%，睇近幾年交投，相信街貨歸邊，舊年底開始有番啲波動，生米煲唔煲得成熟飯，阿莊都冇水晶球，總之記住參與呢類遊戲，風險要自負！