美國上周四提前公布的就業報告非常之強勁，失業率跌至6.1%的近6年低位，而非農業新增職位更高達28.8萬個，最令市場興奮係對上兩個月數字亦向上修訂一共增加2.9萬，呢份報告可謂完美，令市場對美國經濟前景又充滿信心。

歐元兌美元走勢

過去半年，零售業已新增超過10萬個職位，其中三分之二都出現在汽車相關行業，而另一報告亦指服務業例如建築商等亦以近一年以來第二最快速度招聘，可以印證上篇文章，由需求拉動的通脹上升，令美國加息時間將比聯儲預期為早，對美元中線相當有利。

通脹壓力未見抽升

要雞蛋裏挑骨頭的話，今次數據新增的28.8萬增長，係由於減少52.3萬個全職職位而增加79.9萬兼職職位所致，而勞動參與率仍只有62.8%，由於新增的大部分係臨時職位，亦令到筆者建議留意的平均工資未有明顯上升，通脹壓力未有即時抽升。

不過，美國十年債息慢慢回升，令美債跟德國債息差距擴大，雖然未令歐元出現大跌，但始終歐洲央行跟聯儲局的利率預期出現極大反差，歐元兌美元仲未到筆者上期建議的1.3760就回落，今個星期似乎有條件跌穿上次低位1.3500，建議於1.3630沽出歐元，止蝕於1.3700，目標1.3450。