自上周三，金管局入市防止港匯升穿7.75水平，刺激港股大升358點後，大市過去幾日還原基本步，唔多願郁，日日百零點波幅，十零點上落，尋日恒指收市跌5點，報23,540點，主板成交進一步縮水，得482億元，即月期指成交一樣咁奀，得3萬張。

東風下半年新車款獲市場不俗反應，帶動股價反彈。（資料圖片）

太陽日誌

綜合大行預測東風業績（人民幣）

基金經理無嘢好炒，搵港匯強勢及滬港通故事，咬實隻港交所（00388）唔放，尋日再升3%，收報154.1元，是第二大升幅藍籌，僅次於同樣係炒到無嘢炒至郁的中信泰富（00267）。

私有化落空的台泥國際（01136），尋日收市之後發盈喜，預告中期盈利將會較一三年大幅增長，主要受惠於期內水泥及熟料平均售價上升、以及毛利率大幅改善所致。

睇番一三年台泥賺16.75億，上半年貢獻大約三分之一，按潤泥（01313）及海螺（00914）的盈喜，估計水泥行業上半年情況唔比去年下半年差太遠，在去年上半年比較基數較低下，業績有較大幅增長是預期之內，問題是第二季尾水泥價格因為需求轉弱開始回落，會持續幾耐。

華晨短線呈超買

唔少人都知，德國總理默克爾夫人是超級足球迷，早兩日受訪華行程影響，無辦法入場親身為德國隊打氣，咁大犧牲當然唔係純粹為兩國聯宜，學吓點煮宮保雞丁咁簡單。據知訪華行程，重點是中德企業在環保新能源汽車技術合作，被視為訪華重點。近日，寶馬響香港展出純電動車i8，定價253萬大洋，差不多買到半層香港細價樓，講環保，代價真係唔細。

講開寶馬，近排幾隻車股表現都明顯優於大市，六月初至今，華晨（01114）、東風（00489）及廣汽（02238）升幅分別達20%、19%以及17%。

早個多星期前，有消息話華晨提早同德國寶馬傾延長合作期限去到二○二八年，以便寶馬方面把更多車款引進到內地生產。睇華晨股價兩個多星期由13元炒到上尋日16.06元，確實唔似空穴來風。急升後，華晨一四年預期市盈率14.8倍，以今、明兩年預期盈利增長29.2及19.7%，PEG未夠一倍，短期有超買情況，但唔能夠因此話佢唔抵買。

有力挑戰17元

車股中，東風估值向來較低，相信同佢貴為內地三大汽車集團，營銷基數大、業績爆炸力不及其他車股有關，其次入股法國汽車製造商標緻雪鐵龍的交易，之前市場的反應是好壞參半，本文早前亦都走漏眼。

不過，自五月雪鐵龍的供股計劃塵埃落定，加上東風旗下東風日產、本田及標緻雪鐵龍下半年推出車款陸續曝光，市場初步反應唔錯，連續兩年跑輸大市的東風，終於出現報復式反彈，由10元邊起步，去到尋日創埋五十二周高，見過14.72元。

以東風現價14.68元計，一四年市盈率8.6倍，相對過去四年則於6.1至11倍PE之間上落，如果上述兩個使市場突然轉向睇好的因素成立，估計下半年股價唔難去到10倍樓上，即17元左右，同華晨一樣，中期升浪相信仲有餘未盡。