港股表現反覆，跌唔落又升唔起，交投淡靜，現貨成交不足五百億元。但奇怪的是，大市成交唔多，本來氣氛不利港交所（00388），但偏偏尋日其股價卻逆市向上，創五十二周新高154.2元，收報154.1元，升幅3%，成交增至16.3億元。唔排除流入香港煲「滬港通」概念的資金正在吸納港交所。

一拖較一般AH差價概念股優勝之處，在於盈利基礎較穩固。（資料圖片）

其實，除港交所之外，亦繼續見到中小型金融股在憧憬賣殼之下股價飆升，如中國富強金融（00290）、時富金融服務（00510）等。總之係大有大炒，細有細炒。但當然，除非有順風耳，否則炒作賣盤消息多少係賭博靠運氣，真係睇好滬港通後股市交投轉趨活躍的話，實力投資者大可長坐港交所免煩惱！

下半年樓市審慎樂觀

差餉物業估價署數據顯示，五月份本港各類私人住宅單位售價指數按年升0.78%，創歷史新高，且為連續兩個月上升；而租金方面，五月份各類單位租金指數按月升0.26%，更連續三個月上升。

六月新盤銷情理想，揭開新盤熱銷序幕，而踏入七月，又係租務市場旺季，加埋DSD放寬效應，二手市場交投改善。阿莊對下半年本港樓市表現抱審慎樂觀態度。至於在投資角度，地產股股價一般較NAV有一定折讓，但次季地產股做好，折讓已普遍收窄，現時才沾手，心態主要係取其相對穩陣而已。

講到滬港通，正式通車前AH差價概念炒作之風沒完沒了，尋日又再成市場焦點，東北電氣（00042）及浙江世寶（01057）分別升10%及9%。繼續循呢個概念揀選，其實洛陽鉬業（03993）同大連港（02880）AH差價仍大，其中大連港上周股價大起大落，似係試水溫，不排除好戲在後頭，可以密切關注。

此外，第一拖拉機（00038）現時H股價格5.44元，A股折合約10.01港元，都有條件炒作收窄差價。與唔少業績欠奉的AH股唔同，雖然一拖呢兩年盈利倒退，但去年都仲賺緊兩億幾銀，截至去年底每股NAV 5.75元。再睇佢幅走勢圖都唔錯，近周已確認重上250日線，且成交增加。若然短線相關概念繼續熱炒，一拖亦有望隨時開轉快車踢番上NAV水平，甚而試叩6元關，回吐宜守5.1元。