魚缸Blogger：信佳小注短炒無妨

有啲「生面口」嘅信佳國際（00912），上月預告首季訂單錄得雙位數增幅，股價隨即開車，上周五再升0.9%至2.06元，即市創下2.1元的一年新高，唔畏高可小注博見2.3元。

信佳主要從事電子產品、模具及塑膠產品研究及開發、製造及銷售業務，其中電子產品收入佔比高達97.3%，包括寵物培訓器材、專業音響設備、自動收費系統（Wifi模組）及互動教學產品，大部分客仔來自美國、日本及歐洲。公司去年收入增長12.4%至12.4億元，純利增長4.6%至8,148萬元，毛利率亦由13.3%升至14%，原因係美國寵物培訓器材需求保持增長。

早前信佳透露，隨住內地人均收入上升，對飼養寵物的需求亦都增加，相信市場發展潛力巨大，有意開拓寵物產品業務，料將發展成為支柱業務。至於網購方面，去年十一月已於「淘寶網」開設網上商店，銷售更追過實體店，有助進一步提升市場份額同品牌知名度。