近期市場焦點集中在多個新盤上，但原來近月私人物業拍賣場都一樣咁旺場。除咗係因為多咗細價盤同銀主盤推出拍賣，亦同唔少放盤業主肯減價有關。綜合市場拍賣場資料，過去一個月拍賣場上至少有7項物業下調開價，減幅由約3.8到18.7%。

近期私人物業拍賣場去貨快，與不少業主肯減價有關。（資料圖片）

九龍城御．豪門有中層單位下調開價。（資料圖片）

近期部分調減開價的拍賣物業

劉Sir睇番過去一個月拍賣場嘅物業開價，其實有唔少業主都肯讓步，願意下調開價，減幅大概有約3.8至18.7%。

好似黃大仙鳳凰大廈低層住宅單位，開價由428萬減到348萬元，減幅達18.7%。另外，都賣咗唔止一次嘅將軍澳日出康城首都高層LC室，開價亦由410萬，減到385萬元，減幅約6%。

灣仔舖位連減兩次

另外，細價工商物業近年都吸引不少投資者購入，荃灣昌泰工業大廈一個低層單位，早前開價275萬元，依家亦減到250萬元，減幅亦達9%。

灣仔廣生大廈電腦特區低層舖位更減價兩次，最初由738萬減至718萬元，最後更減至698萬元，減幅累積約5.4%。同時亦有大價住宅盤下調開價，九龍城御．豪門有中層單位減幅3.8%，由1,300萬減至1,250萬元。

環亞拍賣曾傑俊就話，其實拍賣場上嘅業主都係比較有誠意出售單位，佢哋唔似市面上部分冇心放售嘅業主「吊高黎賣」，賣價唔創新高都唔賣；拍賣場業主都只係想盡快以一個公道少少、合理少少嘅價格沽出物業，所以都願意下調開價。

銀主無契樓受追捧

曾傑俊指出，政府過去落實辣招，稅項連埋雜費成本實在太高，如果要喺一至兩年內透過物業投資賺取利潤，難度大幅增加。

曾傑俊又話，相信香港人普遍都記得九七至○三年市面上大量平價銀主盤湧現，令人印象深刻嘅年代。

但係依家缺乏同樣投資機會，投資者當然會去拍賣場尋寶，銀主盤同埋無契樓類型嘅筍盤，就成為佢哋追捧嘅目標。