大市在22,800至23,300點悶足個幾月，估唔到一踏入七月，就已經打破僵局，恒指勁升358點，收23,549點，全日69隻牛熊證被強制收回，50隻屬於恒指熊證，主板733億成交，是滬港通消息後最高紀錄，上升及下跌股票分別有987及435隻。從技術走勢分析，恒指升穿了六月高位23,397點以及年初高位23,469點後，下一站阻力會係去年下半年高位24,111點。

京東上市以來累升逾五成，為騰訊帶來龐大帳面利潤。（資料圖片）

尋日個市到底個市因乜事升？內地製造業PMI做好、中央微刺激政策見效，筆者認為最多係基金經理信心增強的理由，講到尾，市升需要新錢流入，金管局入市干預港匯消息，肯定幫到唔少。金管局為防港匯升穿7.75，尋日五度入市，令基金經理不得不放下等運到的心態去追貨。

本文提過，近月港匯離奇咁強勢，自三月見過7.768低位後一直走強，整個六月份港匯大部分時間企住金管局強方兌換保證加50點子內，即7.7500至7.7550之間，顯示資金持續流入港元區，但成個六月港股竟然牛牛皮皮，先至係X檔案一樣難以解釋。

港匯成炒家目標

尋日，人行慌死匯商唔繼續衝擊港元，人行副司長朱隽在記者會上表示，香港將來用唔用聯繫匯率，人行尊重香港自己的選擇。講係咁講，邊有人信阿爺會畀香港人在聯繫匯率上話事？但說法肯定惹來炒家繼續盯實港匯，在港元區游資充裕下，今次港股或者可以行多幾步，話唔定趁滬港通前，升到去24,000甚至25,000點水平。

前晚華爾街三大指數中，道指、標普五百都以歷史高位收市，美國個市有幾癲？舉個例子，五月下旬至上市的京東商城（JD.com），19美元上市價，前晚收29.69美元，累積升56%；早幾日上市的運動攝錄機生產商Gopro，24美元上市，前晚收48.8美元，升103%；網絡及科技股炒風有幾瘋狂，大可感受一二。

投資京東獲厚利

尋日京東啱啱過上市blackout期，瑞銀同美林即刻幫佢出報告，但基於累積升幅唔細，所以都只係夠膽畀佢中性評級，瑞銀目標睇30美元，美林睇31美元。

但計落依家個價，京東市值385億美元，而騰訊（00700）揸住京東14.3%，即當日入股的2.14億美元投資，轉眼間已升值到55億美元，相當於帳面賺412億港元，馬化騰點石成金的威力，可見一斑。

依家成個魚缸都等緊，傳聞八月八日赴美上市的阿里巴巴，以中國企業在美國集資額破紀錄的姿態，強勢登場，並掀動中國網絡股估值水漲船高。尋日騰訊股價炒上拆細後新高，收報122.8元，相當於拆細前的614元。

騰訊一四年市盈率39.8倍，比五年平均估值29.4倍高出超過三分之一，以未來兩年業績複合年增長大約36%，PEG已高於1倍的公認可接受範圍，在追入博短期挑戰129.2元高位的同時，最緊要睇實阿里上市的進展，趁好消息落車。