港股在資金流入之下，恒指創今年以來新高23,576點，收報23,549點，升358點，主板成交明顯增加至733億元。對於資金流入，坊間有唔少解讀版本，其中一個說法話係入場準備認購新股，但老實講，呢期唔見有咩特大晒士IPO，似乎說法有點牽強。阿莊認為，資金釋疑後重新入市係主因，而預期本月公布的內地經濟數據會持續偏好，有利魚缸表現，偷步入市係另一個主因。

內地軍工概念股份成追捧對象，中航科工為少數能受惠的港股。（資料圖片）

總而言之，大市剛破位，且有成交配合，唔信後市會大升，都咪急住對着幹開淡倉。美股又再破頂，今年以來標普五百指數累升7%，港股相對而言表現落後，下半年會否急起直追？有錢到就有希望！基本上，每次由資金流入推動的升浪，唔使動腦筋，押注重磅股就唔會有咩閃失。

騰訊挑戰高位可期

八月阿里在美股登場，此前科網股好大機會又再落鑊炒一轉，騰訊（00700）股價在七月第一個交易日呈現突破，高位見123元，收報122.8元，是浪目標挑戰三月份高位129.2元。

日本政府尋日在臨時內閣會議上正式決定修改憲法解釋，以解禁集體自衞權，此舉意味日後即未受攻擊，日本也可以為阻止針對他國的攻擊而行使武力。咁搞法，即係話日本行咗半個世紀有多的和平政策出現歷史性的改變。可以預期，中、日之爭勢必加劇，各自增加軍備亦係預期之內，故見尋日內地股市軍工股表現突出。

港股之中，可被視為軍工概念的股份唔多，且離不開「中航」二字，尋日就見中航科工（02357）股價曾高見4.6元，收報4.5元，升2.7%，成交1.15億元。睇番幅圖，其實中航科工股價自上周五起已見異動，由低位4.16元起步，升至尋日高位4.6元，三個交易日累升一成，且成交轉趨活躍。

事實上，今年中國國防預算逾千億元人仔，按年增加12%，在現時的亞洲局勢之下，相信未來數年中國軍費支出只會有增唔會有減。據高盛早前的分析，在中國軍費中，慣常有三分一用於設備採購、約兩成半用於購置航空產品。現時專門做直升機、教練機、通用飛機、航空零部件等業務、且已成為母公司整合資產主要平台的中航科工，有望成受益者。

再睇中航科工現價預測市盈率約22倍，估值唔算便宜，主要反映港股中同類股不多、母公司背景以及注資概念。其現價僅處去年底相若水平，250日線4.28元乃主要支持位所在。若然短線氣氛利好軍工股，計落現價都仲有得諗，目標反覆向上試破4.8至5元阻力區。