六月最後一個交易日，基金半年結，周一港股終於有番多少波幅，即市波幅386點，是六月二十三日挑戰23,393點不果倒跌之後最波動的一日，收市跌30點，報23,190點。埋單計數恒指半年跌115點或者0.5%，日市期指收23,104點，較合理值高水29點。

恒指期貨走勢

五月中大市挑戰23,000點後，橫行悶局個多月未見突圍，愈來愈多投資者擔心今次又係圓頂派發格局。不過，上周初港股一度急挫，兩日後可以拗腰再上解除威脅，虛驚一場。

退後睇番上半年，港股高位是第一個交易日的23,469點，二月初輾轉跌落21,197點，之後港股主要圍繞這範圍內上落，期間三次挑戰23,000點水平，二月一次，去到22,986點止步，四月有3個交易日指數能收於23,000點樓上，反觀五月底到六月，高位橫行時間比前時更長，反映大市支持區有上移迹象。

近日港匯持續偏強，港元區資金充裕，只可惜，遲遲未見一個能夠逼基金追貨的催化劑，在現貨升穿23,397或跌穿22,802點前，期指客可以做的實在唔多。