話咁快，一四年已過咗一半，上半年大市擺脫不了上落市，恒指波幅更愈玩愈窄，六月指數高低位唔夠六百點，連牛熊證及期指玩家都大呼救命。經歷「五窮六絕」之後，會唔會出現「七翻身」？金管局昨晚多番向市場注資，不排除有好戲上演。

煤價可能處於長期低迷狀態，有利電力股維持一定的利潤水平。（資料圖片）

太陽日誌

美林預測華潤電力業績（港元）

最近官方與滙豐編制的中國PMI數字，先後腳返到50的盛衰分界線樓上，但未令市場對中國經濟前景放下心頭大石。中央反貪腐對民生經濟的影響，仍在擴散之中，香港奢侈品、鐘錶及珠寶零售急跌，內地零售業增長也在放緩。澳門的六月博彩收入按月及按年跌16%及4%，再加上第二季開始，內地樓市有盛極而衰之勢，發展商削價促銷，各地地方政府逐漸鬆綁一些調控政策，但樓市依然未見起色，反映中國經濟調整周期仍在進行當中，股市未必可在短期內打破橫行悶局。

油股跟隨油價走強

講番個市，周一恒指跌30點，收報23,190點，總結玩咗半年，恒指累積跌115點。五隻累積升幅最大藍籌股，分別係信置（00083）、潤電（00836）、騰訊（00700）、中石化（00386）及中石油（00857）。烏克蘭及中東的地緣政治風險上升，國際油價由一月初低位91美元回升至近日的105美元水平，解釋到兩隻油股進入藍籌升幅榜的原因。

筆者已經不止一次提過○七年之後，本地地產股普遍見頂，與愈升愈有的樓價呈現背馳，在特區政府修訂DSD辣招，被視為壓抑樓價措施辣度已經見頂底下，地產股具備追落後的爆發力，手上一股地產股都無的話，在下仲係建議追供股減債又唔使高價私有化旗下中國地產子公司的新世界發展（00017）。

騰訊價值各有觀點

老實講，騰訊到底值幾錢，真係唔識睇！有人25倍PE話貴，亦有人40倍PE都認為值，從投機角度，近年唔少對沖基金經理搵有故事、市值及成交深度足夠的股份，選擇唔係咁多，故他們的籌碼都高度集中在博彩股及騰訊身上，亦令這批巨無霸，每次急跌都吸引到新資金捧場。

展望阿里巴巴好可能在八月到美國掛牌上市，屆時中國網絡股會像二○○○年科網股中，達到一個年代的高潮，抑或騰訊、阿里藉資本市場的免費資金，繼續創造出更大的網絡神話？只能等歷史話答案畀我哋聽。

其實，內地電力股可算是經濟前景不太明朗下的理想避難所，尤其是煤價可能處於一個長期供過於求、價格低迷的狀態，即使內地電力需求維持5至7%增長，已經有利電力行業維持一定的利潤水平。近期內地傳中央放風調低電價，未有動搖到電力股的走勢，可見市場熱錢的睇法。

潤電因為去年華潤系的醜聞而失去溢價光環，現價一四年PE不到10倍，估值相當吸引，股息率3.2厘，加上預期未來兩年維持大約一成增長，現價風險有限，筆者估佢下半年見25元甚至更高水平的機會應該唔細。