過去半年港股反反覆覆，埋單唔見百幾點，成交淡靜，仲未被悶到離場，都算係有耐性有實力之人。展望下半年，市況繼續反覆抑或否極泰來，尚未有明顯方向。事實上，相對於年初，次季內地經濟有回穩迹象，但下半年上升動力有幾大，尚要更多經濟數據始能下判語。阿莊相信，第三季魚缸波幅會明顯擴大，但總體表現審慎樂觀。總而言之，今年投資表現如何，食粥定食飯，就睇季內捉唔捉得正上車機會！

第三季有新iPhone登場，相信是大戶翻兜兩隻本地電訊股的主因。（資料圖片）

特區政府次季放寬DSD換樓期限，壓抑已久的購買力一觸即發。除咗新盤銷情理想之外，向隅客轉投二手市場，亦令二手樓市出現小陽春，相信踏入七月租務旺季，樓市氣氛更加熱鬧，第三季本地地產股料可繼續跑贏大市。信置（00083）在售新盤受惠政策放鬆，次季股價反彈兩成，如今尚處上升通道內，現價預測市帳率0.53倍，息率逾4厘，短線調整在12元邊仍具留意價值。

中移毋須睇太淡

中電信（00728）和聯通（00762）獲工信部批准發放FDD-LTE試驗網牌照，並可在內地16個城市開展LTE混合組網試驗。消息公布後，三隻中資電訊股表現迴異，中電信升1.61%、聯通升0.84%，中移（00941）則跌0.53%。中移面對的同業競爭日趨激烈，唔係新聞，某程度亦已反映在估值，故見中移股價雖然低收，但跌幅亦有限。阿莊反而覺得，中移的資產待開發的空間甚大，尤其係現時智能手機大行其道，圍繞三網融合的題材甚多，問題在於政策上是否有足夠的靈活度支持企業積極發展。以目前估值，阿莊並不過分看淡中移，但論眼前的效益，則聯通仍是相對優勝。

再睇兩隻本地電訊股數碼通（00315）同和電香港（00215），今年上半年股價大部分時間在低位徘徊。直至六月下旬，終於出現突破。數碼通連升五個交易日，成功突破自去年十一月以來的主要阻力位9元關，本周一收報9.76元，重返250日線樓上，10日線重上50日線，黃金交叉初現。至於和電香港亦連現兩支大陽燭，成功突破逾半年的阻力位3元大關，周一收報3.16元。

趁機提升市佔率

第三季蘋果公司有新iPhone登場，相信正是大戶翻兜兩隻本地電訊股的主因之一。最近投行對行業看法改善，亦為板塊異動提供藉口。改觀的原因，不離競爭對手內部整合，服務收費加價在望，數碼通可藉機搶攻市場份額。

到底最終新iPhone反應如何，同業競爭怎樣發展都係後話，股票價格永遠行先實際情況，一份憧憬已足夠炒家借題發揮。以數碼通走勢而言，既以大成交扭轉逾半年悶局，今季應該有運行，暫看下一個較大的阻力區在10.5元，短線整固守9.2至9.3元水平可予考慮。