魚缸Blogger：堡獅龍勝在價細易炒

本地服裝股終於有得威番次，堡獅龍（00592）近年業績持續復甦，尋日再發盈喜，刺激股價狂飆13.1%，收報0.69元，短線如果可以突破埋前高位0.73元，話唔定可以再破頂。

堡獅龍啱啱發盈喜，預期截至今年六月底止全年溢利將比前年大幅增長，原因係內地及台灣業務顯著改善。睇番成績表，雖然一二至一三年度收入倒退8%，不過純利仍能增長38%，而到一三至一四年度中期更激增1.2倍，期內毛利率亦由48%升至49%，其中內地及台灣業務虧損減少，反映公司關閉表現欠佳的店舖及成本控制措施奏效。

查實公司全球分店近千間，主要收入來自香港市場，已經連續多年錄得增長，品牌bossini形象適合家庭，去年更與芝麻街同海洋公園合作，可提升品牌知名度、吸納新客戶群。雖然比起德永佳（00321）、佐丹奴（00709）甚至I.T（00999），公司規模算細，不過勝在價細易炒！