Fundman睇市：地產股可跑贏大市

尋日內地股市插水，滬綜指跌31點，跌幅1.55%，主要受內房股下跌拖累，而本港兩隻藍籌內房股華潤置地（01109）及中國海外（00688）均跌超過2%。有分析認為內地房地產市場存在結構性泡沬，其中一線城市去化率和購買力不算差，但二、三線城市則有空置房屋，估計當地樓價仍有下調壓力。如此情況下，相信內房股短期仍難有運行，現階段還是不沾手為妙。

長實可望挑戰高位

相反，本地地產股在加息陰霾暫時消除下，昨日普遍反彈，其中以長實（00001）表現最突出，升2.6%，至於新地（00016）、新世界（00017）及信置（00083）均升逾1%。事實上，近日一手新盤銷情暢旺，當中長實旗下荃灣「環宇海灣」在上周六推出新一輪單位，兩日共沽出389伙。

長實今年至今銷售收入已達到108億元，意味全年數字會較去年顯著上升，至於新地年初至今亦成功套現126億元。長實下半年仍會積極推售新盤，包括日出康城三期及嵐山，而新地下半年亦有多個項目待推。基於今年餘下日子加息的機會不大，為地產商推盤製造良好環境，所以下半年地產股絕對有跑贏大市條件。

長實股價今年二月開始反覆上揚，六月初觸及141.5元高位之後便見頂回落，惟上升形態仍未改變，有機會重返前高位並再創新高。

昨日市況雖靜，但殼股成市場焦點，引入新股東的英發國際（00439），五月底停牌前股價僅0.335元，本周一復牌顯著做好，反覆升抵昨日高位見1.26元，交投活躍，真係信者得米！

至於昨日另一隻炒賣殼的股份，係達進東方照明（00515），公司披露控股股東獲洽售持股，消息一出，股價裂口高開見0.64元，即市並一度飆上0.73元，收市報0.61元，升幅28%，成交3,296萬元。

炒殼股要量力而為

正因為博中呢類成功賣殼的股份，回報可以好高，故吸引到散戶落注。但當然，十隻傳聞賣殼的股份，可能不到一隻能成事，要從短炒呢類股中獲利，除非係春江鴨水暖先知，否則投機味甚濃，只宜限注參與，且轉身要夠快，事關消息堅定流，唔使幾耐就知道，見唔對路要嚴格執行止蝕。

想成功扑中殼股，難度甚高，唔想博錯連渣都冇，最好揀個殼乾乾淨淨，之前冇咩供供合合，近年股價又冇乜點大炒過，以免有人只是藉賣殼傳聞炒高出貨鬆綁。又或者揀啲業務類別真係有「錢景」的，市場對相關殼股真係有需求的，例如依家唔少買家搵從事金融業務的殼股，呢幾日異動的中國富強（00290）正係好例子。

反而，那些長年業績虧損，業務又處低潮的垃圾股，唔係話冇可能吸引買家，但轉手後業務性質一旦大改，可能遭監管部門攔路當新上市，又或者要等兩年冷河期完結才慢慢轉型，總之變數多，買家有得揀自然唔會吼！