六月份只餘下七個交易日，月初至今恒指高低波幅僅447點，再係咁落去真係人到癲！月底就係基金半年結，會唔會有番啲波幅，方向上定落？睇上大人不斷四出維穩，照計買上贏面大過買落，只是未來兩周本港太多不明朗因素，個市會點走法真係冇得估，所以都係唔賭指數就唔使煩惱！

憧憬內地經濟在下半年提速增長，內房市場亦可望扭轉目前的跌勢。（資料圖片）

展望後市，隨着六月份內地「錢荒」同七月初本地重大不明朗因素都消除，加埋七月中旬世界盃閉幕，寄望七月中下旬魚缸交投會有所改善。

A股有被低估之嫌

尋日滬綜指跌31點，收報2,023點，又再接近政策底兩千點了。展望第三季，A股焦點之一乃IPO重啟。近日國務院總理訪英，多番強調中國經濟唔會硬着陸，又保證經濟增長下限不會低於7.5%，咁講法，憧憬第三季中央會再出招力挺經濟的想法好正路。大摩最近發表的報告亦指出，現時A股市盈率8.6倍係明顯低估，預期下半年人行會減息一次，而A股的上升空間則為11%。

過去兩年，A股都在下半年回升，今年係咪冇例外呢？近兩年內地經濟在下半年提速增長以趕及實現全年增長目標，兩大資產市場股市同樓市都要向上力撐。言則，近日內房股出現的弱勢，可能係部署下半年倉位的好時機。

尋日內房板塊氣氛進一步轉淡，中國海外（00688）、恒大（03333）、潤地（01109）及雅居樂（03383）跌幅介乎1至3%，在迎接下半年的反彈到臨前要先來一次探底的可能性頗大，想作中線部署，就要睇實眼前跌浪中各大內房股的承接力。

每次行業轉勢，龍頭股必先動身，故部署抄底當然亦以龍頭股為首選。中海五十二周低位在17.52元，亦係今年以來的雙底所在。近一個多月股價反彈尚未具足夠動力重上250日線，掉頭再試雙底支持亦不足奇。且耐心觀察17至18元水平承接，若下半年走勢對辦，目標重上21元水平。

碧桂園（02007）的走勢亦相似，三月以來雙底承接在2.8元水平，亦係由去年末季高位計累跌0.5的支持所在。近周股價已確認失守10日及50日線，短線睇跌，暫且冷眼旁觀，耐心等待人棄我取的時機！