美國議息後，市場憧憬本港低息環境持續，為二手樓市火上加油。向為細價上車天堂嘅天水圍嘉湖山莊，有三房單位賣成415萬元，絕對係屋苑九七年後最貴嘅標準單位。另外，鴨脷洲海怡半島今個周末預約睇樓，即刻多五至六成。將軍澳二手睇樓客更即時出動，尋晚睇樓量亦即晚多一成半，更錄投資者入市個案。

市場憧憬本港低息環境持續，帶動多個屋苑睇樓量急升。（資料圖片）

嘉湖山莊錄得買家以高價搶貨。

低息環境持續下二手反應

有代理同劉Sir講，嘉湖山莊近排賣到無乜盤剩，市場一收到低息持續嘅消息，即有買家高價搶貨。

MIDTOWN獲千萬承接

日前有個麗湖居5座中層B室，建築/實用面積約811/630方呎，減咗幾萬賣415萬元，破晒屋苑九七年後標準單位售價紀錄，建築/實用呎價約5,117/6,587元，單位兩年升值逾76%。

中原蕭頌崴話，元朗YOHO MIDTOWN第8座高層C室，四房套房間隔，換樓客睇咗兩年樓，終於用1,000萬元買咗呢個單位，創屋苑分層標準戶新高，建築/實用呎價約7,831/10,121元。

班準買家聽到有排唔加息，即刻出動睇樓。中原王昭康講，海怡半島今日同聽日預約睇樓，比上個星期多五至六成，當中大部分睇買賣盤，睇租嘅只佔三成，大部分都話趁低息入市。

中原張光耀講，鰂魚涌太古城單日錄兩宗三房買賣，就算連租約嘅明宮閣低層H室，都賣965萬元，實用呎價約1.37萬元。

美聯馬立成講，將軍澳尋晚閒日睇樓量都比平時多一成半，有投資者即刻以540萬元，買咗個首都6座右翼中層連租約單位，實用呎價約7,930元。

維景灣畔數客爭盤

中原梁顯信話，同區維景灣畔11座中層F室，放盤五個鐘頭，即有多組客睇樓同洽購，最後以開價750萬元賣出。屋苑依家得番4個鎖匙盤，今個月有15宗買賣。

另一方面，居屋同樣都有高價成交，有人爆料，何文田居屋俊民苑C座單位，近期以515萬元易手，實用呎價9,296元，呎價隨時追到九龍居屋王。