IMF調低全球經濟預測，美股狂牛終於抖抖氣，恒指昨收報23,175點，跌82點，主板成交484億元。

恆指期貨走勢 2014/6/12

工行（01398）除息，恒指下跌，而早已預料受除息因素影響的期指，低水幅度繼續縮窄，六月期指日市升37點，收報23,143點。國指情況一樣，跌76點，收10,431點，國期升24點報10,347點，兩期與除息後合理值比較，實際分別有41點及24點溢價。恒指波幅指數再跌0.02至13水平。

世界盃開鑼前，期指成交縮到3.28萬張，大市始終擺脫唔到拉牛上樹局面，破23,224點後，去到23,327點及23,360點行人止步，日線圖上MACD顯示上升動力正在減弱，對好友不利，但話說回頭，喺咁靜嘅市況下，如果大孖沙都可以暗手大規模部署六月下旬大挾倉，神人也，真係抵佢贏。

老實講，搵個客觀理由利誘大戶挾上去，唯一係23,300至23,700點之間，有相當於2,900張期指的熊證街貨，反觀掉轉頭殺埋22,700點，最多宰到大約2,000張期指牛仔。純睇圖，滬綜指有W形上破頸線的趨勢，無乜心水下，手上國期好倉繼續咬住佢唔放。