魚缸Blogger：華能新能源大行唱好

暴炒妹上周五推介的中國風電（00182）爆升9.5%，留意到另一隻華能新能源（00958）似乎亦都跟上，喺大行唱好下，急升6.4%，收報2.79元，即市差啲掂到四月高位2.82元，配合短線黃金交叉利好，短炒目標睇住3蚊關先。

睇番成績表，華新能過去五年收入持續遞增，去年收入增長逾四成至57.9億元人仔，純利增長近六成至8.8億元人仔，原因係內地部分區域限電情況緩和、公司新投產項目多分布在非限電地區，同埋加強電量營銷管理及準備治理工作。期內發電量增長32.6%至1,114萬兆瓦時。至於今年首季發電量差過去年，倒退近半成至281萬兆瓦時，但相信已經反映喺股價上（今年以來高低位差距44%）。

上周五瑞銀出報告，話華新能今年股價累跌超過三成，市場過分憂慮減電費對盈利的影響，並相信估值已反映短期季節性因素同維修成本增加風險，預測一四至一六年盈利複合年增長率30%，畀佢目標價3.4元，建議買入。