上周五，美國公布五月非農業職位增加21.7萬個，輕微高過市場平均預期的21.5萬，失業率維持6.3%不變。數據重點係連埋呢21.7萬個職位，○八年金風海嘯後，美國打爛的880萬個飯碗，正正式式完全收復失地。當晚道指及標普500指數分別以歷史新高收市，報16,924點及1,949點，十年期債息變動唔大，收2.59厘。

今年廣汽重點針對普羅用家，保守估計盈利會有五至六成增長。（資料圖片）

太陽日誌 2014/6/9

大行預測廣汽業績（人民幣）

通脹無威脅，息口未有耐向上，加埋就業市場復甦持續，華爾街淡友無晒市場。唔信？俗稱恐慌指數的VIX，急跌8.1%去到10.73，創○七年以來新低，VIX愈低意味市場認為後市短期轉向的風險愈低，簡單講，即係通街好友。標普500樂觀指數（Bullish Percent index）升至80.6，睇番過去三年，指數每次去到84至90例必掉頭，可見美股消耗性升市已開始，但仲未進入危險區域。睇嚟馬雲隻BABA（阿里巴巴美國上市代號）好有可能食到正美國股市高峰上市，時機的掌握，真係不能不寫個服字。

歐洲央行落重藥

美股強勢，唔多唔少都要多謝歐洲央行出招，眼見歐元區通脹由一一年九月的高點3%，五月跌至0.5%的四年半新低，通縮威脅下，歐央行一次過請大家食齊一套救市字母粉，透過ABS、TLTROs、MROs，直接或間接提供市場流動資金，仲破天荒歷史性地推存款負利率，將銀行放在央行的存款息率由0.1厘降至-0.1厘，實行鼓勵借貸，懲罰儲蓄。

消息後，歐元急跌去到1.35的近五個月低位，之後意外地拗腰倒升，返到1.3630水平，似乎唔少外匯炒家認定措施短期應可刺激歐元區投資氣氛。

歐美市場星光璀璨，中港股市卻係發霉等運到，上周五恒指波幅指數跌至13.73，是接近十六個月低位，成個星期恒指累積跌130點收報22,951點。不單只股市，剛公布的五月澳門博彩收入增長放緩，四月香港零售銷售按年急跌，在在反映中央反貪腐的影響層面愈來愈廣。

市場日益劣質化

今日無論基金經理或者藥房老板，為生存都首要學懂得揣測政策動向。眼見政策市最壞的地方，是傳統投資理念，針對個別行業或者企業的微觀分析，通通變得無效，近年搵到食的基金，唔少係孤注一擲，賭政策轉向又幸運地押中寶的機會主義者，市場日益劣質化，實在唏噓。

筆者睇好汽車股，見廣汽集團（02238）上周五股價突破，收報8.52元，創個半月新高。五月份旗下汽車銷售升43%至7.77萬輛，首五個月累積銷量升35%至47.4萬輛，開始預售的廣州本田Fit，大行話收到預訂數目理想，好有可能超越公司每月7,000至1萬輛的銷售目標。

今年廣汽重點是針對普羅用家，一四年業績保守估計，預期增長達五至六成，一四年市盈率10.4倍，第一季跟住一眾車股插水，股價曾見7元樓下，相信已見中期低位。保守計，年底前應該有機會升抵10至11元的阻力區。