港股六月雖然開門紅，可惜恒指卻高開低走，上周五收市報22,951點，較上周二高位23,327點回落了376點，亦係五月十二日以來首次失守10日線收市。到底由五月上旬展開的升浪是否經已完成，未來兩周表現將可提供明確指引。不過世界盃本周開鑼，班炒家多咗賭波機會，唔多唔少影響魚缸炒作氣氛，大家有心理準備要捱吓悶市！

富智康經營手機代工業務多年，在爭奪智能手機市場上具一定優勢。（資料圖片）

到目前為止，唔見得今年六月內地會重現「錢荒」危機，反觀五月份內地製造業數據已見回穩，有利中央維穩工作。上周五，國務院下發通知，要全面督查政策措施落實情況，各地區各部門向國務院上報自查報告，再由國務院派督查組分赴進行實地督查，於七月十日前將督查報告上報國務院。

官方維穩A股難動

這場由上而下的打貪及整肅活動，有投行估計會令今年中國經濟損失逾千億美元，可不是小數目，但中央信心未有動搖，未來更不排除會容許更多違約同破產個案出現，將不合格的業者淘汰。是故本月A股在官方維穩下，未必會大跌，但同時在各項改革持續推進之下，上升的動力暫時亦有限。

TCL通訊（02618）四、五月來咗一次大震倉，股價落到7元邊，都算係跌得比預期略多，但五月份先後有基金入場增持，股價又好快上番去9元邊。花成個幾月時間進行震倉，係咪醞釀大茶飯跟尾，不妨等着瞧。

智能手機尚未飽和

繼續聚焦呢類股份，其實論走勢，隻富智康（02038）都唔輸蝕。受惠內地智能手機市場蓬勃發展，富智康憑着華為同小米兩大客戶，生意唔憂做。此外，富智康與美國投映機品牌InFocus合作推出的智能手機「富可視」，據聞會在下周限時一天在天貓推售，價格將由899元人仔減至499人仔，性價比可與小米旗下產品比較。

內地智能手機尚未到飽和之時，廠商各出奇謀，推出性價比甚高的產品搶攻市場。以富智康在經營手機零件及相關製造服務的多年經驗，擁有絕對優勢。

股價上月初開始由低位3.75元開始反覆回升，一連重上10日、250日及50日線，上周更突破4.5元水平阻力，周五收報4.56元，14日RSI在65，都未算超買，可以留意搭順風車機會，目標上試4.8至5元區域，回吐支持位在4.2至4.3元水平。