過去五年在金融海嘯最壞情況下，只得兩間央行夠膽減至零息或負利率。對上一次係一二年七月丹麥央行出手，當時一宣布克朗兌美元就即刻跌多2.8%。

如果用現價計，歐元跌大概3%即係可以跌到1.3250左右，歐元跌就啱晒央行既心水，因為可以刺激出口，不過現實歐元係咪話跌就跌都有好多因素左右。

如果歐洲央行肯出手，市場或者反而當好消息炒，因為歐債危機再爆風險減低。有歐洲央行包底，更加令市場有信心買入歐債，債息進一步走低令歐豬國家既融資成本下降，令投機者可以趁低執平貨。

因此，歐元未可以睇得太淡，技術上1.3520至1.3530已有初步支持，阻力位就由1.4000下移至1.3760至1.3780，料歐元會先跌後回穩。睇番上兩次央行出手，貨幣都跌多一至三星期就見頂回落，有好消息出貨的味道，今次就唔好後知後覺先去追沽，反而建議1.3520至1.3550可以考慮先食胡。