本周焦點有兩個，一個係環球央行議息，澳洲今日打頭陣，周三就輪到加拿大央行，而歐洲央行同英倫銀行周四公布結果。不過，無可避免係歐洲央行做主角，唯一要留意係英倫銀行的言論會唔會暗示加息。

歐元兌美元走勢

自上次開會後，歐央行暗示下次會議會出手，「乾炒」咗一個月，相信今次出手機會好大，預期今次會將基準利率由0.25厘調低10至15點子，存款利率就減至負利率，目的「簡而清」，就係將存入央行帳戶的銀行資金迫出嚟，迫企業加大商業投資，希望資金可以流入實體經濟。

減息預期已反映

其實歐洲依家失業率都仲係高，銀行借貸又唔夠多，即係內需唔掂。內需唔掂都可以靠出口幫手，惟歐元匯價強，出口一樣死，所以就睇吓歐央行想搞內需定係兩樣都搞。

睇睇西班牙似乎又推經濟刺激方案，有機會將企業稅由30%下調至25%，都係希望歐洲經濟復甦可以進一步突破樽頸，由企業加大投資帶動，增加就業率最終令工資上升，令家庭可支配收入上升，從而鼓勵消費，呢個良性循環順唔順利，就要由時間去證明。

在周四開會前仲有大量歐元區國家例如德國、意大利、法國、西班牙等公布製造業PMI，等大家議息會前都仲可以借勢將歐元推多一浸落去。不過，都話已經「乾炒」咗一個月，歐元亦已由接近1.40跌至最低穿過1.36，可以話將因素反映咗喺匯價入面，除非今次減息力度超過15點子，否則歐元有條件喺獲利平倉盤出現下先做技術反彈。

雖然大方向都仲係睇好美元睇淡歐元，惟現價就唔建議再追沽歐元住，因為值博率唔高。今個星期支持位係1.3520至1.3530，阻力位已由1.4000下調至1.3780，建議等反彈至1.3720至1.3750先重新開淡倉，止蝕於1.3800。

至於另一焦點肯定係周五嘅非農業新增職位數據，今次預期增長18.5萬至21.5萬個職位，算是較穩健、健康的數字，當然同上次嘅28.8萬個比就梗係無乜睇頭，但可預期匯價喺本周尾段先係炒作重點。