港島中區甲級寫字樓租賃成交愈嚟愈少，上環信德中心東翼、金鐘力寶中心，同埋灣仔會展廣場辦公大樓等唔少業主為咗「破冰」，都會連環劈租吸客，累積減幅由約9至20%都有。其中，信德中心東翼有個低層單位，業主放咗租超過半年，加埋四度減租，累積減幅約20%，最新意向呎租只約36元，返番去幢物業約兩年前成交租金水平。

美聯工商舖黃漢成指出，中區寫字樓租盤充裕，業主要大幅減租才能突圍盡早租出。(資料圖片)

近月港島甲級寫字樓劈租搶客個案

事實上，雙倍印花稅辣招下，寫字樓買賣成交勁減，唔少業主都轉售為租，令租盤大增，雖然有業主肯減租求客，但未能刺激租賃成交回升。

首五個月租務少4成

劉Sir睇番代理嘅資訊，今年頭五個月，中區甲級寫字樓租賃成交只約50宗，比起舊年同期少約四成，有業主唔想單位長期租唔出，都願意擴大減價空間。

其中租盤充裕嘅寫字樓，減租情況最明顯。聽講依家信德中心東翼租盤有約30個，比起今年初多咗約33%。

金鐘五幢租盤百個

如該廈低層單位，業主約半年前開始放租，意向呎租約45元，今年農曆年前已將意向呎租減到約43元，近月再減至每方呎約39元，上月再決定大刀闊斧劈到每方呎約36元，累減約20%，以面積約1,600方呎計，意向月租金約5.76萬元。

金鐘5幢甲級寫字樓放租盤達約百個，減租搶客情況仲明顯。有代理話，該區力寶中心2座低層戶，面積約2,200方呎，業主今年初招租，意向呎租約48元，三月初調低至約45元，都無人吼，早前將意向呎租減至約41元，貼近該廈呎租約38元嘅近年低位水平，以面積約2,200方呎計，月租金約9.02萬元，累積減14.6%。

雖然依家灣仔會展廣場辦公大樓放租盤源唔多，但部分業主都急於出租，短時間內連番減租。消息稱，該商廈一個面積約3,000方呎中層戶，業主放租約三個月間兩度減租，最新意向呎租約60元。

美聯工商舖（00459）行政總裁黃漢成話，中區甲級寫字樓業主減租下，可望本季租賃成交量可低位回升。