滙豐中國五月份製造業PMI回升，去到49.7，逼近50的盛衰分界線，並創五個月新高，尤其新出口訂單指數回升到52.7，是一○年十一月以來最高。A股對數據反應麻麻，滬綜指先升後倒跌3點，收報2,021點，港股一度重上23,000點樓上，去到23,053點，收市前軟番，升117點，報22,953點，整體大市仍然離唔開行三步退兩步的悶局。

受補貼政策到期及割價戰影響，創維發盈警並不令人意外。（資料圖片）

太陽日誌

兩隻掛牌新股，街外IPO得大約三分二貨有人認頭的北車（06199），收5.09元，比招股價5.17元潛水1.5%，牽頭的瑞銀睇嚟有點功架，不過趁深潛前最好仲係走人。另一隻得1,000萬股擰出嚟畀散戶抽吓，最終超購428倍的碧瑤綠色（01397），收1.24元，比招股價1.2元高四格咁大把，都係嗰句，市靜都係避開新股為上。

中燃新奧逢低買

中國天然氣集團同俄羅斯天然氣公司Gazprom，簽訂30年的供氣協議，一八年開始，每年向中國供應380億立方米天然氣，協議總值達4,000億美元。有證券行計過數，每立方米成本大約2.2元人民幣，同現時內地從土庫曼進口管道燃氣價格差不多，考慮埋供氣管道成本，應該比現時內地氣商的門站價每立方米大約2元人民幣高些少，可以預期，未來幾年內地氣價好大機會繼續上調填補缺口。

尋日燃氣股全線做好，主要係芬佬睇重協議差不多等於中國目前向外購氣總量四分之一，長遠減低對單一國家的供應依賴，穩定長遠供應，對幾間各自完成搶佔「山頭」的大型管道燃氣商業務發展有利，不過短期好消息出晒，近兩三星期又升咗唔少，捧場客或可以等等，心水中國燃氣（00384）及新奧（02688），長遠依然係逢回要買。

競爭對手頂爛市

創維數碼（00751）發盈警，股價插7.6%，收3.49元，同五十二周低位僅3.39元一步之遙。公司指今年三月底止年度業績倒退，主因去年五月節能補貼政策到期，中國市場電視需求疲軟所致。

逐個月睇番佢嘅銷售數字，其實盈警唔意外，去年八月至今年二月的七個月，創維的電視付運量都錄得按年跌幅。就算係海外，由舊年八月開始，都有六個月付運倒退。截至去年九月中期，創維盈利仲有26.4%增長，賺7.19億，由此可以想像，下半年倒退幅度相當大。

創維上半年度仲撐得住，主要靠高端4K超高清電視增長，抵銷部分2D液晶電視銷售及毛利率下跌壓力，近期樂視（Letv）同小米等有私募基金水喉射住，大把彈藥玩割喉減價的公司，都開始染指4K網絡電視市場，由京東網站所見，創維50寸4K電視賣緊5,199人仔，小米啱啱推49寸的小米電視2，賣3,999人仔，樂視仲離譜，50寸新機賣2,999人仔（雖然要畀多980人仔作為廿四個月網絡電視內容供應費）。

創維業績如跌兩成，現價PE 4.8倍，係平，但面對咁多以本傷人的對手，生產電視毛利率又低，創維亦不過18至22%左右，對手賣價居然平兩成三，點玩？