老一輩教落，幾時都係買「磚頭」最保值，只要識揀，幾年前就算買間公屋收租，依家閒閒哋都有十幾厘回報。黃大仙鳳德邨有個公屋單位，啱啱租咗1.2萬元，用五年前購入價計番，租金回報有成16厘，近排東九龍區租盤供不應求，呢啲公屋租金隨時可以再升一截。

黃大仙公屋鳳德邨有單位，月租萬二元，回報有十六厘。（資料圖片）

公屋租金高回報個案

預期公屋租金升幅未見頂。（資料圖片）

富誠地產陳錫金同劉Sir傾開，話東九龍啲租盤好有市場，就算係公屋鳳德邨，之前硃鳳樓一個中層單位，建築/實用面積約579/443方呎，都租咗1.2萬元，建築/實用呎租約20.7/27.1元。

嘯後購入 百萬有找

用番上述單位業主於二○○九年買入價90萬元計，回報有成16厘。其實有代理講，同類單位月租，近排做過近1.3萬元，睇嚟公屋租金仲有得升。

就算未入伙，租客都爭住租，將軍澳天晉II估計仲有幾個月至入伙。消息話，屋苑1B座中層單位，建築/實用面積約698/550方呎，月租約1.75萬元畀人預租咗，建築/實用呎租約25.1/31.8元。

其實近排個租金走勢平穩，中原指出，四月份全港85個私宅屋苑，平均呎租約22.6元，按月跌0.4%，雖然係近十個月新低，但跌幅輕微，十大屋苑中更有一半租金升番。

迎海跟風 反價8萬

睇番買賣市場，近排連入伙盤都要反價。消息指出，馬鞍山迎海1期2座單位，原本個業主570至580萬元都肯賣，見個市郁番，反價8萬元再賣588萬元，實用呎價1.18萬元，畀埋SSD同其他使費，都要蝕幾萬銀。

六福行吳家榮話，粉嶺牽晴間9座中層B室，爭到送訂都仲有3個客爭緊，有買家畀多2.8萬元，用502.8萬元至爭得贏。

盈翠價企硬賣650萬

樓價點會唔升，中原伍遠帆話，屯門大興花園2期1座高層H室，睇樓三個多月上車客，用328萬元買咗，高市價13%，實用呎價約7,828元創屋苑新高。

該行郭家強表示，青衣盈翠半島今個月錄得約9宗買賣，當中7座高層C單位，價都唔使講賣咗約650萬元。