本來諗住市況向下，誰知上周恒指最多升929點，一口氣重上10日、50日及250日線，只是成交未見配合。若然月底結算前，恒指又再失守牛熊分界線，再向下試波幅區底部，將會是今年以來第三浪。到底21,000點水平是否真的牢不可破，阿莊都係平常心看待，反正呢一刻真係冇Mood落場買貨，惟有繼續冷眼旁觀，話唔定要繼續捱上落市，悶到下月底世界盃收爐，魚缸先至會有大突破。

有指旺旺乳品業務表現欠佳，但相信股價跌幅已充分反映。（資料圖片）

中國旺旺(00151)

多得政府為樓市減辣，上周長實（00001）股價創五十二周新高134.8元，收報134.5元，逆市升0.4%。新地（00016）股價重上百元大關，其公司輪（01441）價格更由前周五收市價5.09元，升至上周四高位見7.7元。

內房睇中海做頭

回說最近中資股反彈，無論內銀、內房，科網抑或新能源股，維時較短暫且都並不容易獲利，有何啟示值得深思。針對內房股，各大投行聯手唱淡，會唔會咁益人在大跌前先來個反彈，就要做事後孔明。總而言之，睇實龍頭股去向捕捉大方向，以中國海外（00688）為例，首兩季股價在17.5至17.6元水平營造出雙底，季內一旦跌穿雙底支持，整個板塊就宜緊急疏散，以防一次較大型的跌浪緊接而來。

越南反華潮令區內地緣政治風險升溫，但到咗上周五，部分受影響的港股股價已開始回穩，如裕元（00551）上周五收市升0.6%、天虹紡織（02678）及信星集團（01170）分別升2%及4%。後事發展如何尚屬未知數，呢啲環境最壞情況係企業要將當地的投資全額撇帳，並影響當年盈收表現，所以即使估值已某程度反映了風險因素，但咁多股票好炒，還是別玩火中取栗。

上周五見到旺旺（00151）股價急挫6.3%，收報11.2元，成交3.76億元，成為表現最差藍籌，單日市值足足蒸發100億元，惟觀其餘兩隻台資食品股統一（00220）及康師傅（00322）股價均未見異動。

向芬佬打聽，據講可能同旺旺的乳品銷售欠佳有關，最近公司已因此透過提高對經銷商的回贈以加快去庫。以上周五收市價計，旺旺預測市盈率降至23倍，息率2.8厘。若只是產品庫存問題，相信跌幅已作反映，短線不妨留意低位承接，話唔定有機會冷手執個熱煎堆！