今次美股調整，港股果然守得住，總算是沒有白交學費。另一個深刻的教訓，是要有想像力，最重要是不拗頸，現在港股指數擺正軚向上尋頂，好倉甘於食雞胡無所謂，千萬不要無端白事睇唔順眼掉頭做淡，這次很可能是低成交兼且只得少數股票參與的升浪，指數升幅卻有權甚勁。

以前自己非常執着，睇好指數的話，先要拆解不同板塊的潛在升幅，例如金融股升幾多、地產股又升幾多。但今時今日，自己已經去到一邊博中港地產股回，一邊博指數升，假如問睇好挾那一類股票，答案是無信心，換言之，是退化到當恒指是一個數字，總之到時到候總會有一兩類股份挺身而出，拉高指數，只不過事前多數估不到。

衍生工具勝在方便

轉變睇法，自動降級，一來是受過太多教訓，見過許多次大藍籌此起彼落，跌股不跌市，又或者升市不升股，二來是選股實在太大難度，而且無信心。其實自己有少少想博中資股宏觀好轉，可是買個別大型國企，怕開唔中，始終是負債普遍偏高，員工臃腫再加定價能力低，買負擔較輕的民企，又怕中伏，隨時個個贏錢自己單獨輸，所以把心一橫買指數。簡單之餘，勝在衍生工具方便，例如博爆冷，年底前中資鹹魚翻生，買十二月國企指數11,000點call便算，用較低成本便可以布下伏兵。

暫時炒市不炒股仍然會是潮流，中外皆是。過去兩個月股市外強中乾，大部分股票輸死人，成交又未回復，在這個環境中博個股，是需要有坐長線豁出去的豪氣。在順風順水，大把帳面利潤墊底的環境，當然是無問題，但現在卻是需要食旺個莊追數的時候，自然不想去冒額外的風險，寧願等市況進一步好轉才算。