今個星期五有兩幅具相當發展規模嘅住宅地截標，包括大埔白石角科研路同埋啟德第1H區3號地盤限量地。之但係早排白石角有地皮出現流標事件，相反啟德發展區喺中資財團追捧下，地價愈戰愈勇，唔少測量師老友都覺得兩幅地皮反應會好唔同。其中白石角地皮仍然有流標風險，估計每方呎樓面地價低至4,000元，比同區地皮流標前估值大減兩成。

大埔白石角科研路住宅地，估值每方呎低至四千元，市場預期仍有流標風險。（資料圖片）

理想城市張聖典表示，即將截標的兩幅地皮中，以大埔白石角科研路地皮隱憂較大。（資料圖片）

兩幅將截標住宅地資料

劉Sir知道，上述大埔白石角科研路住宅地，係上季賣地計劃規模最大嘅地皮，總樓面達約73萬方呎。

科研路地料僅29億

不過，較早前推出嘅隔籬科進路住宅地，論規模論位置都同呢幅科研路地皮相差無幾，雖然地皮都收到7份標書，但最後都係未達底價流標收場，所以政府如果唔調整吓科研路地皮底價，真係再次流標都唔出奇。

老友理想城市張聖典話，嚟緊截標嘅兩幅地皮，以大埔白石角科研路地皮有較大隱憂，呢區未來供應相當龐大，再加上隔籬地皮三月流標收場，所以會睇得比較淡。但相信政府吸取之前流標經驗，或者會彈性處理呢幅白石角地皮嘅底價。

其實市場都唔睇好白石角科研路地皮，當中以高緯環球睇得最淡，較之前再估低兩成，估計樓面呎價約4,000元，折合估值約29.24億元，係市場下限價。

相反，啟德新發展區有中資財團撐住，地價愈來愈高，好似內地房企保利置業（00119）投得嘅第1I區3號地盤，成交樓面呎價高達約6,530元，劉Sir相信即將截標嘅第1H區3號地盤反應唔會差。

限量條款影響不大

高緯環球張翹楚話，已先後有內地財團投得呢個發展區嘅地皮，出價比本地發展商更取進，唔排除今次再有內地財團入標競投，就算地皮有限量條款，需提供不少於630個單位，但相信截標反應會較白石角地皮熱烈。市場估值約22.72至24.78億元，樓面呎價約5,500至6,000元。