有時股民喜好真係好難理解，股份拆細或者送紅股，因為每股盈利及資產最終都係按比例平分，從投資角度考量其實無分別，偏偏股民就係最受呢套。

面對餘額寶以高息搶走存款，內地銀行惟有照辦煮碗迎戰。（資料圖片）

太陽日誌

尋日騰訊（02988）拆細，升5.8%，收108.8元，相當於舊價544元。由啡底變紅底之後，騰訊要到廿九日先至改每手股數，可以想像，尋日有彈藥在舊「窗口」按每手500股入貨嘅散戶，唔係貪較低的入場費（收市價每手5.44萬元）。

昨日單係騰訊一隻股票成交，已經佔大市一成，去到56億，多過排第二至六的中移（00941）、建行（00939）、滙控（00005）、工行（01398）及金山軟件（03888）嘅總和，個市有幾側埋一邊，可見一斑。

在騰訊帶動下，恒指連升第六日，升148點，收22,730點，無騰訊的國企指數則跌20點，收報9,971點。A股走勢極曳，插22點收2,024點，10、20及50日線穿晒，睇落2,000點唔係好穩陣。

中央出口術托市

周初，一個由央行組成的銀行聯合會議上，人行要求內地銀行，確保住房消費貸款，利率定價合理，加快貸款處理速度。市場解讀，中央見到近期內地樓市突然吹起淡風，連北京五一假期銷情都按年大跌八成，所以希望透過出口術托一托市，向市場傳達銀行放鬆房貸的訊號。

啱啱有朋友計劃四川置業，同筆者呻話同當地銀行申請按揭，問過要畀到指標利率加2至3厘（即7至8厘）先借到錢，最後覺得唔划算打退堂鼓，事件多少睇到內地銀行對審批按揭謹慎至極，準業主要取得借貸，比想像中更難。

有券商指，過去十年內地樓價粗略計累積升1.6倍，依家家庭財政負擔比率跌至新低，愈來愈多內地民眾認為自置物業並非「必需」，加上內地發展商近年大舉擴大借貸及投資規模，庫存積壓情況開始浮面，準買家預期割價促銷會出現，等跌價先買的心態形成，令需求進一步萎縮。

餘額寶吸金力強

撇除房地產相關風險，銀行唔願在按揭市場太過進取，筆者認為亦多少同馬雲有關。事關阿里巴巴推出年化收益去到6至7厘的餘額寶，其吸金力強到暈，短短一年用戶突破8,000萬之外，今年首季存入規模已達5,400億元人民幣，漸漸威脅傳統銀行生意。

近半年內地銀行為阻礙存款外流，照辦煮碗，推類似貨幣基金產品迎戰，好似A股興業銀行推的「掌櫃錢包」，畀到5.5厘樓上的年化收益率，超越近月收益率跌返到5厘左右的餘額寶。似乎利率市場化，已經間接由阿里巴巴開了第一槍。

銀行一方面要以相當於目前人民幣活期存款0.35厘的十多廿倍成本來吸納存款，為要維持一定的放貸息差，好自然在回報最低的物業按揭生意上放軟手腳。有見於此，雖然近期內房同內銀股走勢唔錯，但筆者相信，只屬係估值跌至過分殘的一次修正，論基本因素其實並無太大改善。