越南現反華浪潮，會唔會演變成兵戎相見，不得而知，更要提防其他鄰近國家如菲律賓同日本隨時再生事端。話唔定一路在唱空中國的老外又會乘機加多兩錢肉緊誇大地緣政治風險，趁火打劫。總之，外部開始有點「亂」，局勢變化莫測，可大可小，呢刻持倉唔多，最好繼續持盈保泰，隔岸觀火好了！

安踏連續四個季度錄得訂單增長，確認公司業務已走出低潮。(資料圖片)

騰訊（02988）股份昨日開始拆細，頓成魚缸焦點。估唔到高開見110元，眨眼就見全日高位112元，收市報108.8元，升5.8%，成交高達56億元。不過，依家騰訊仲係五百股一手，入場費未變，要等五月二十九日每手100股開始並行買賣，先至真正見到入場費下降後散戶對之有多大興趣，亦唔排除呢兩個禮拜大戶繼續托住股價，等月底先向散戶進行大派發。

開放A股有隱憂

MSCI季檢結果公布，入圍股普遍做好。講開又講，今年三月MSCI啟動對A股加入旗下新興市場指數的諮詢程序，如無意外會在下月有結果，一旦成事會在一五年開始生效。滬綜指尋日跌22點，收報2,024點，在內部經濟增長持續放緩、新一批IPO重啟在即、時現恐襲、外部又有反華事件，呢啲環境A股表現算係唔太差，皆因依家A股尚未全面對外開放，表現仍在上大人掌控之中。咁亦可以理解到，點解聽到建議納A股入MSCI系列指數時，內地市場有反對聲音，主要係擔心一旦道門開咗、個場大咗，將難以控制，最終還是由炒功老練的外資主導。

下個月就係世盃開鑼，開始有資金盯實體育用品股。尋日見安踏體育（02020）升7%，收報12.08元，成交7,044萬元。其他如李寧（02331）亦升4%、特步（01368）及匹克（01968）則輕微高收。消息方面，安踏公布，上月結束的二○一四年第四季度訂貨會訂單金額保持正增長，按年錄得低雙位數升幅，乃連續四個季度錄得持續而穩健的訂貨會訂單增長，進一步確認公司業務已走出低潮，重拾正軌，相信消息對股價起到有力支持。

自二月底升穿11元關後，股價維持在11至12元水平上落，近兩日成交明顯增加，話唔定有資金泊入順道乘世盃即將開鑼熱身炒一轉，是浪目標反覆向13至13.8元推進，回吐守穩11.4元可續持有。