政府為用家着想，只要稍為減吓辣，成個市即刻生猛番晒。好似將軍澳怡心園有個極低層單位，一個月連續三度被承接，雖然中間兩次被撻訂，但個價就跟住市場需求係咁升，賣到最後嗰轉賣貴咗15萬元，成交價約435萬元，計埋每次殺3%訂金，業主另外再有廿幾萬元進帳。

將軍澳怡心園有單位月內連續三度被承接。(資料圖片)

鴨脷洲海怡半島連錄多宗逾千萬元大額成交。(資料圖片)

怡心園極低層戶轉售過程

利嘉閣萬育民同劉Sir講，怡心園2座極低層一個「縮則」單位，建築/實用面積約798/610方呎，依家市價都要過五百萬，上個月中即放即賣約420萬元。

海怡月內5宗大刁

新買家因按揭問題上唔到會而要撻訂，因為業主可以開門睇樓，今個月初再賣433萬元，但係估唔到新買家因壓測又上唔到會，結果撻訂，但啱啱又賣咗435萬元，建築/實用呎價約5,451/7,131元。

換樓客主動，鴨脷洲海怡半島今個月有5宗逾千萬大刁成交，中原王昭康稱，屋苑22座中高層H室，減10萬賣1,190萬元，實用呎價約1.37萬元。

市傳屋苑同座有個高層單位，都賣1,180萬元。該行何偉峰講，牛池灣峻弦3座低層套三房單位，以1,205萬元沽出，實用呎價1.16萬元，原業主揸貨三年帳面蝕35萬元。

該行又爆料，大埔太湖花園1座複式單位，賣822萬元，實用呎價約8,388元；青衣換樓購買力都被釋放，同區青怡花園6座低層A室，用家以約338萬元接貨。

翠林平10萬火速沽

世紀21奇豐李仕明話，大圍恒峰花園1座中層D室，同區換樓客506萬元購。美聯高文帆話，屯門翠林花園有曾發生事故同層單位，只平市價10萬元賣220萬元。

買家印花稅（BSD）推出一段時間，稅務局終收到相關稅款，該局尋日公布，有關條例刊憲後，喺三及四月份分別確認有1,827宗及2,139宗成交要畀BSD，並支付稅額逾58.8億元。

四月亦有65宗要畀額外印花稅嘅交易，按月多番19宗，涉及稅款約1,680萬元。當中有230萬元係追收嘅附加額外印花稅（SSD2）。