內地進出口數據勝預期，帶動恒指昨日彈90點，收報21,837點，惟大市沽空比率升至12.4%的逾兩個月高位，反映做淡大戶積極開倉。另一個令筆者對昨日升市有所保留的原因，是基金經理換貨手影明顯，由濠賭等增長股換入電訊、內銀等低估值防守股，相信暫時維持上落市格局機會最大。

恆指期貨走勢

大市有幾十點進帳，但氣氛頗淡。隨着指數成分股擴大到50隻，指數覆蓋面愈廣，炒期指唔能夠因為基金洗倉狂沽增長股而追淡，以昨日為例，兩隻藍籌濠賭股拖低指數52點，亦拖累其他新經濟股如小股災般，但落後多時的中移（00941）挾高3.3%，抵銷當中46點損失，結果指數不跌收場。

恒指於23,224至21,680點的短期調整是否見底，不宜太早下判斷，或有待重上22,044點樓上企穩至諗。昨日話手上國期輸少當贏，多得資金回流內銀，國期早市曾見9,782點，輸幾十點止蝕執番身彩。

講番恒指期貨，雖然有得升，但日市收21,627點，低過全日加權平均成交21,661點，意味唔少死硬派過夜盤可能坐緊艇，即市高位21,774點又成為超短線好友攔路虎。