近排科網股、燃氣股同手機設備股等前度熱門板塊，先後被隊到反白眼，尋日輪到對沖基金搵大錢的濠賭股，銀娛（00027）及金沙（01928）雙雙急跌，話就話因為傳澳門計劃七月修改內地客過境逗留的期限，以及銀聯推措施打擊在賭場碌卡，阻截資金外逃，但講到尾，濠賭股由○九年金融海嘯至今，升足五年，近期內地訪港澳的個人遊旅客，不論人數同消費力都有見頂迹象，大孖沙搵藉口清空倉底，其實一啲都唔出奇。

滙控一四年股息率估計有5.22厘，股價下跌空間應該有限。（資料圖片）

太陽日誌 2014/5/9

綜合大行預測滙控業績（美元）

傳統基金同散戶最大分別，是基金經理每年收基金託管人巨額管理費用，斷無可能將倉底變晒現金等運到，近期見有大行統計，本地基金現金水平處於相對高位，出清過去兩年大幅跑贏大市的增長股之後，點都要搵地方停泊，惟有先搵住一些穩陣，估值低殘的股份擺住先。

中移成追捧對象

尋日八百幾隻股票向下，唔少基金股猶如遇到股災一樣，恒指仲有90點進帳，收報21,837點，要多得石油、電訊同內銀股撐住。兩隻賭股交投激增，金沙成交股數創廿三個月新高，估吓基金買乜？油股及內銀價硬但未見成交異動，反而半死不生的中移（00941）股價升3.3%之餘，成交股數仲比前日多七成八，有黃袍加身味道。

75元樓上追唔追，見仁見智，基本因素是營改增的新稅務規定，同埋統一發展基站消息，對一哥中移都唔係太有利。更重要係，基金買貨同散戶唔同，尤其一些以指數做表現基準（bench mark）的互惠基金，唔一定要押重注股份做好，如果佢地認為後市唔掂，泊落中移度，只要其他股份同埋基準指數（例如恒指或MSCI HK）跌得比中移多，年結時已經有晒交代。

季績已算有交代

滙控（00005）首季稅前盈利67.85億美元，跌20%，季績曝光後，在倫敦及美國預託證券都跌得比較多，反而昨日香港市僅跌0.19%，收報78.25元。歸納今次季績，環球經濟仲係相對疲弱外，最主要是投資減值的一次過變動影響。

綜合大行預測，滙控今年全年盈利有179.6億美元，而大部分大行預測未來兩、三年，其收入與純利都只會有單位數增長，一四年10.7倍PE，1倍PB，抵唔抵？觀點與角度問題，筆者會以股息行先。近期見渣打（02888）、香港滙豐的Perpetual債券，原來通通唔夠5厘息，得4.8至4.95厘。

滙控首季一級資本比例平穩，只係輕微從10.9%收窄到10.8%，如果環球經濟展望風平浪靜，滙控應該無危險，亦毋須要減派息，一四年股息估計有5.22厘，高過十年美債2.6厘成倍，除非聯儲局出年突然轉軚，甚至大幅加息，否則80元樓下的滙控，下跌空間應該好有限，最大風險，反而係怕當股市氣氛逆轉，揸滙控會輸蝕畀其他有增長故事支持的股票。