因為數年一遇的嚴寒天氣，年初美國經濟也被冰封，第一季GDP增長僅得0.1%，較去年第四季的2.6%增長呈大幅放緩，亦遠差過市場預期的1.2%，數據主要受商業投資減少2.8%，創○九年第四季以來最差表現所拖累。

市盈率跌至單位數的金飾股，已具重新留意價值。（資料圖片）

太陽日誌 2014/5/2

綜合大行預測周生生業績（港元）

周三晚美股變動唔大，三大指數均有進帳，媒體解讀聯儲局繼續減少100億美元買債規模，確認經濟增長放緩歸咎於惡劣天氣，屬非戰之罪的睇法，意味主席耶倫無突然將貨幣政策轉向，等同向股市派定心丸，美國經濟仍在穩步復甦之中。

就業數據成焦點

到底係咪咁樂觀？睇埋今晚美國公布的四月就業數據至知。大行估計非農職位增21萬份，比三月的19.2萬份多，但睇見GDP公布後十年美債息隊落2.64厘收，跌0.04厘，貼近三個月2.58至2.82厘橫行區的中下方，多少反映債商對聯儲局退市步伐緩慢推進的睇法，應有利資金繼續由成熟市場回流新興市場，問題是大落後的中港股市，仍在等待足以令資金回流的消息出現。

假期前的港股玩死人，周二期指結算日炒高321點，翌日隊番319點，打回原形，周三恒指收報22,133點，跌市主板成交671億元，是整個四月下旬最多，可見基金出貨都幾狠。

騰訊（00700）失去大牛股地位，跌26.3元或5.1%，收報483.2元，啱啱搭住一月調整低位，一來美國的Twitter季績虧損多咗，市場預期周三晚美國納指的網絡股可能見血，在香港先隊為敬，搵騰訊開刀。講基本因素，五舊水相當於36.5倍PE，以一四年每股盈利增長大約32倍，PEG已經進入大約1倍的比較合理水平，心口有個勇字者，可以諗諗博反彈。

騰訊再跌唔出奇

不過，史提芬早排亦都講過，今轉騰訊在600元樓上，唔少私人銀行大客貪45厘高息，狂開騰訊ELN甚至「阿Q」，股價跌到500至520元附近，進入接貨區，相信好多都會先選擇做對沖，形成正股插多浸絕對唔出奇，博反彈可以留意，見成交縮至入手比較上算。

新股不敵股市冷風，萬洲國際（00288）即使搵到廿九間承銷商、取消賣舊股仲縮IPO規模三分之二，但最終都係擱置上市，依家IPO有幾冷清可見一二。啱啱開始招股的新豐泰（01771），真係要考保薦人摩通功力。

「五一」前夕，本地零售股意外地連些少鑊氣都無，好似周生生（00116）、莎莎（00178）及六福（00590），股價唔單止貼住近期低位，同去年底今年初高位比較，更分別累跌27.4%、29.5%及35.2%，弱到暈。

統計話，祖國十三億人口中，只有少於3%，即大約3,500萬人來過香港，隨着內地工資年年升，其實長遠有更多人有條件嚟香港「濕平」。當然，對比以往的豪客，平均消費亦都會相對低番些少。講番轉頭，兩隻金飾股已經跌至單位數市盈率，佢地相對抗貴租能力又比較高，其實已經可以開始睇番，在下認為過去一季的調整應該差不多。