四月份市況有波幅冇升幅，展望五、六月，先別論指數升跌，相信大市交投仍然偏靜。最近美國科技股遇冷鋒，開始有傳言指阿里在美上市計劃或會延至世盃後才啟動。睇近期騰訊（00700）等一眾科網股沽壓沉重，話唔定大戶們已聞風先遁，所以都係咪心急撈貨。事實上，次季市況存在較多不明朗因素，內地連月發生恐襲氣氛緊張、經濟增長持續放緩、「水荒」月將至等，總之要打醒十二分精神，盡量減少短線操作，以免投機唔成變投資。

中通服雖有電訊基站重組消息支持，但股份表現一向慢熱，持貨要考耐性。（資料圖片）

阿莊100萬元投資組合

萬洲（00288）IPO未能成事，阿莊呢排都聽到唔少花邊。據講公司老總對上市估值作價要求甚高，班外資投行認為叫價去得太盡，好言相勸，但班阿總一於少理，除原定十幾家承銷行，還找來十家中資行加入承銷團助陣諗住萬無一失。惜近期內地養豬業正處下跌周期，公司本身集資亦不過是用作減債，偏偏上市前幾個月公司才向高層發放總計約6億美元股票獎勵，凡此種種，投資者看在眼內，對高價接貨自然卻步。

萬洲未能審時度勢

再講，即使併購美國同業後已成全球最大業者，但市佔率亦不過係單位數。旺市「全球最大」四個字更貴都有人捧場，但在淡市就未必咁值錢！原先話七家聯席保薦人揼心口搞掂七、八成貨，冷不防傳來美國有豬瘟令大戶抽飛，而班中資行實際上亦只係充當啦啦隊角色，結果棄售舊股削減集資規模都搞唔掂，最終要擱置上市計劃。整件事，看來失策在於未能準確審時度勢，無論係企業家抑或小投資者，都應引以為鑑！

前日三隻中資電訊股藉重組基站消息炒上，中移（00941）、聯通（00762）及中電信（00728）分別逆市升0.7%、5.8%及3.1%，但當晚卻傳來三大下月起須按營改增試點稅率繳付增值稅，變相發「盈警」，消息一負一正即係冇事發生。

講到電訊股，中電信的通告證實三大正在商討合組鐵塔設施公司。市場有指，三大皆有持股、一向負責電訊基建運維的中通服（00552），有機會擔當一定角色，故見前日股價逆市上升3.4%，收報3.93元，成交增至1.11億元。

黃金交叉訊號初現

走勢上，黃金交叉利好訊號初現，且有成交配合，14日RSI在62，未算超買，若短線回吐守穩3.7元水平有得諗，成功突破4元關的話，下一個較大的阻力區在4.5元水平。但投資者亦宜有心理準備，事關呢隻股一向較慢熱，要慢火煎魚，持貨要考耐性，但勝在估值不昂貴，息率4厘，可攻可守。