前晚美股回穩，道指回升87點，但作為新經濟代表的科網及醫藥股繼續見沽壓，拖累納指微跌1點。聯儲局指美國三大銀行之一的美銀美林，在○九年合併期間計錯數，錯誤估算手上結構性票據公允值，實質持有資本好可能低過預期，前晚股價因而急挫6.2%，3.43億股易手仲創埋一年新高，唔少人以為美國金融系統發達，原來都可以咁蝦碌。

新西蘭原乳今年以來持續跌價，對內地上游乳業股影響負面。（資料圖片）

太陽日誌2014/4/30

未來兩日市場焦點係一連兩日聯儲局議息結果，九成九大行預料會繼續縮減每月買債規模，下月會再縮100億至450億美元，值得一提新浪分拆出來的微博（代號WB），掛牌後見過24.24美元，股價已輾轉回落，前晚隊8.8%，收報17.51美元，同17美元的發行價僅一步之遙，睇怕最唔想見佢破發的，會係招股已轉正入大直路的阿里巴巴首領馬雲。

基金換貨手影明顯

期指結算日，港股收市前一個鐘先嚟挾，恒指由最多跌過33點，到收市倒升321點，報22,453點，主板成交611億元，配唔配合升市見仁見智，但基金換貨手影十分明顯，銀娛（00027）及金沙（01928）兩隻新經濟股分別插4.5%及2.6%，反而幾隻舊經濟股撐起個市，持淨現金兼高派息的defensive股中移（00941）勁升4.5%，連同友邦（01299）、滙控（00005）、中海油（00883）及三隻藍籌內銀，七隻股票已經貢獻恒指210點。

早兩日講過達芙妮（00210）隻可換股債券六月中到期，可以諗諗佢，估唔到轉過頭揸住隻CB嘅私募基金TPG，同達芙妮管理層傾掂數，同意延長CB期限至明年四月，同時豁免達芙妮利息及顧問費，變相免息借多一年錢畀達芙妮。

從好的一面諗，達芙妮短期唔使趕住班水贖番批CB，有更多彈藥食住《星星》熱，谷新簽代言人全智賢的廣告。不過，壞影響係批CB行使可能性仍然存在，相當於11%的攤薄效應，似乎暫時可以睇定啲先唔使急。

現代牧業正路之選

尋日兩隻乳業股隊到開巷，現代牧業（01117）的非全資附屬公司現代牧業集團公布，首季盈利2.24億元人民幣，勁升1.77倍，收入升85.7%，至12.39億元人民幣。瑞信報告亦唱好，認為現牧今年主打加強成本控制，產品售價及產量增長理想，目標價睇4.5元，但尋日無端端隊低7.4%，收報3.36元。

乳業股被洗，一來新西蘭原乳今年跌緊價，多少對內地上游乳業股有心理影響，更重要係輝山（06863）禁售期一過，兩個基礎投資股東急不及待出貨，消息困擾下，輝山尋日最多隊低18%，收市仍跌9.8%，報1.65元，同舊年九月招股價2.67元相比，帳面上經已揩緊成蚊。

一一年輝山上市前以可換股票據引入的基礎股東，上市前票據換成股份，計落每股成本只係0.73元左右，兩蚊邊掟仲係獲利甚豐。講到底，禁售期一到舊股東狂質，姑勿論影唔影響營運（始終仲有彤叔未出過貨），對不知就裏的投資者而言，引發恐慌是在所難免。

假如大行預測無太大出入，一四年市盈率14.1倍，同現牧的14.9倍唔差幾遠，尋日見1.6元附近營造成交密集區，筆者唔反對能承受高風險者博下即市反彈，但穩陣計，似乎都係現牧甚至控股股東蒙牛（02319），會係比較正路之選。