一手住宅物業銷售條例實施啱啱滿一歲,一手住宅物業銷售監管局(下稱銷監局)專員馮建業話過去一年新例都行得幾暢順,市場都推咗1.2萬個住宅單位,截至上個月底收到53宗投訴,超過一半係嚟自銷售安排同埋失實陳述。

一手住宅物業銷售監管局專員馮建業(左)表示,新例雖然已實施一年,但不認為目前是簡化條例的好時機。右為該局副專員區皚寧。

新樓銷售投訴類別

其實相比起地產代理監管局每年收到嘅代理投訴數字,一啲都唔多。不過,馮專員話佢哋面對緊一班好強嘅對手,但執法方面絕對唔會手軟。佢仲漏口風話,有違規個案已轉介律政司建議檢控,但具體數目就唔講住。

劉Sir尋日就去咗銷監局喺柴灣寫字樓特地搞嘅新例生日記者會,專員馮建業一開始就話,大家睇住條例出世,呢一年嚟條例運作都好暢順。

截到前日,過去一年有76個新盤已經開售咗,提供約1.2萬個住宅單位,上咗樓書而未賣樓就有12個,涉及800伙;而截至上月底,佢哋收到嘅投訴有53宗,其中17宗,即約三成二係關於銷售安排;而失實陳述及傳布虛假或具誤導性資料佔兩成二。另局方已檢視約330份樓書,價單同銷售安排文件,就有約670同400份。

冀珍惜條例自由空間

專員仲話,雖然大體上發展商都守法賣樓,不過,近期有啲行為係佢哋唔鼓勵,好似將同一批單位喺同一日上下晝,畀內購或者大戶揀完,先到公眾揀樓,好多時到買得少單位嘅細戶嗰陣,唔知仲有無單位揀。

所以局方建議發展商,同一批單位應該分開兩日招呼唔同買家,等後者有足夠時間知道有咩單位揀。

另外,對於有發展商以較低售價開售嚟做宣傳,但最後又唔拎單位出嚟賣,甚至加價嚟做宣傳嘅行為。

馮專員話,呢啲手法只會產生反效果,令準買家覺得畀人玩。佢仲語重心長咁提醒發展商,要珍惜條例賦予作商業決定嘅自由空間。

目標令賣樓公平透明

被問到覺唔覺得發展商響度挑戰緊局方底線,馮專員話,佢哋面對一班創意同適應力都好強嘅對手。

此外,佢哋就住失實陳述呢類嚴重行為,執法絕唔會手軟,總之目標係令賣樓高透明度、公平同獲得市場所認同。