放完復活節假番嚟，個市仲係未見起色，恒指昨跌29點，收報22,730點，主板成交得482億元。到底係芬佬未放完假番工？抑或佢哋都睇唔通個市？在下比較失望是微博在納市掛牌兩日，升足兩日，以為可以為其他中資網股包括騰訊（00700）股價沖喜沖喜，殊不知昨日仲要隊低1蚊散場。

內地加大對頁岩氣項目的投資，為一眾油服股帶來刺激。（資料圖片）

太陽日誌 2014/4/23

騰訊昨日發行3年以及5年期債券，基於標普畀佢A-的高評級的關係，指標息率不過2.296厘以及3.571厘，據聞發行規模3億至5億美元，點知未到黃昏截飛，食晏時認購額已經有40億美金過外，同股市牛牛皮皮的氣氛明顯有差別。債券玩家仲係無限量想向騰訊提供鈔票，為佢同阿里巴巴的天價購物活動，提供低成本融資。

華潤系有機博反彈

尋日悶市中的焦點，是華潤集團董事長宋林涉嫌違紀違法被調查。一直以來，民企都被指良莠不齊，間中都會有一兩個計時炸彈被引爆，傷及無辜已經見怪不怪。今次最唔好的仲係連央企都畀人管治質素唔好得去邊的壞感覺。

最慘仲係華潤系捧場客，一年前先至捱過天價買山西爛礦醜聞，昨日又一次畀大孖沙洗倉藉口，最傷的華潤電力（00836）重挫9.6%，成為最差表現藍籌、華潤水泥（01313）同華潤創業（00291）齊跌4.1%、華潤燃氣（01193）跌2.7%、華潤置地（01109）跌2.9%。

睇番去年五月被指控收購山西金業煤焦化集團資產瀆職，其時潤電股價由25元邊，洗到落17元至停步。今次爆鑊威力，相信無上次咁勁。

一來經過去年爛礦事件，潤電在電力股中一直存保持的溢價光環無咗，目前估值處於相對低位，一四年講緊得8.7倍。而展望將來，新領導登場後，定必同基金經理講點樣搞好integrity，信唔信都好，在壞消息出盡下，未來幾日如果見股價逐漸企番穩，短期可以博一博反彈。

中資股難有高估值

但當然，受類似醜聞影響引發股價跳崖式急跌的頻率愈來愈密，投資者定必為中資股加上更大風險溢價，在管治質素真係做到同國際標準睇齊前，中資股要爭取較高估值真係唔易。

中石化系炒重組概念，全線逆市高收，中石化（00386）及上石（00338）同升3%，儀征（01033）升1%。估計中石化為下游業務引入民資的計劃要下半年才有初步方案，即係話重組概念仲有三、兩個月炒。

此外，中石油（00857）話擬加大投資頁岩氣的消息，提振油服股表現，安東油服（03337）升6%、華油能源（01251）升8%、宏華（00196）升5%、TSC（00206）升9%。

論走勢，TSC走勢最強，昨日高位4.63元，乃五十二周新高，且大陽燭有成交配合。觀去年業績，論盈利增幅，TSC亦於同類股中稱冠，可見走勢脫穎而出實有其原因，料股價表現可繼續跑贏同類股。