港股復市一如預期市況淡靜，主板成交僅482億元，消息指萬洲（00288）招股反應未如理想，廿幾家投行承銷表現亦如是，可想而知市況有幾好？華潤系股份全線下挫，其中潤電（00836）跌幅最大，達9%。阿莊認為，再跌一浸，中長線潤置（01109）同潤泥（01313）都唔怕分注低吸。

具有智慧城市概念的神州數碼，股價未能反映其資產價值。（資料圖片）

尋日收市前傳來人行宣布自本周五起正式下調縣域農商行農合行存款準備金率，但港股反應不大。其實，相關消息已於上周曝光，事緣上周三的國院常務會議已確定，要加大涉農資金投放，對符合要求的縣域農商行和農合行適當降準，只是尋日才由人行公布詳情。

中信泰富不宜睇淡

呢種定向寛鬆貨幣政策，既不會給市場錯覺中央又要搞「四萬億」大開水喉救市，又能針對宏觀經濟薄弱環節注入動力。參考○八年九月內地降準，同樣由中小型存款機構開始，可見一旦經濟表現真的不達標，人行有機會進一步擴大降準範圍，此舉足以叫想做空中國的外資大鱷有所顧慮。

個股方面，中信借殼中信泰富（00267）在港上市，為央企海外上市開創先河，會否有更多央企仿傚做法，就要拭目以待。雖然近期唔少大行發報告唱淡中信泰富，但阿莊就並不悲觀，反而相信，之前的中信泰富受制於主營礦產業務表現，已一段時間被外資大行遺棄，冷不防被母公司借殼上市，依家班大戶手頭根本冇咩貨，唱淡係要配合佢地的收貨行動，長線中信泰富值得睇好。

講到上市，據講聯想控股亦計劃在一六年前整體上市，系內股份亦值得關注。神州數碼（00861）受累於業績倒退，股價反覆走低，由去年初接近14元，反覆回落至上月低位7元，市值唔見一半。以尋日收市價8.1元計，市帳率僅1.1倍，市值89億元，反觀其投資主打智慧城市概念的慧聰網（08292），市值已達112億元，真係妹仔大過主人婆！

阿莊認為，如果睇好智慧城市概念，直接選擇慧聰網係毋可厚非；至於神數，吸引之處係股價未能反映資產價值及潛力。今年初，其IT消費業務已穩定下來，若上半年企業業務亦告回穩，相信最快下半年可迎來復甦期，屆時股價有望較合理地反映資產價值。若上半年股價再次觸及甚而低於NAV（7.06元），實力投資者可考慮人棄我取。