元朗近年發展愈來愈成熟,喺區內發展酒店商機無限。好似新地(00016)就元朗YOHO MIDTOWN酒店發展計劃向城規會提出申請,項目第IIa期會做酒店發展,提供324間客房,比起已經撤回咗嘅方案起多32間;而第IIb期同埋III期住宅發展就以不變應萬變,維持提供約604個單位。

新地就YOHO MIDTOWN酒店發展向城規會提交規劃申請。(模擬圖片)

YOHO MIDTOWN第IIa期酒店發展資料

其實新地去年都已經向城規會提出申請,將YOHO MIDTOWN綜合發展區西面嘅土地,即係第IIa、IIb及III期。

住宅維持提供604伙

當中IIa期會發展酒店,IIb及III期作住宅,提供292間酒店房同埋604個住宅單位,不過申請喺早排已經撤回咗。

劉Sir啱啱睇過城規會嘅最新文件,今次新申請第IIa、IIb及III期發展基本布局無乜點郁,第IIa期都係打算作酒店發展,總樓面約13.1萬方呎,但客房總數就會增加32間,將提供約324間客房。

不過,去年新地同時申請做酒店及教育機構用途嘅「政府、機構或社區」用地,今次就剔出咗申請範圍,所以申請地盤面積略為減少咗大約2.9%至大約38.8萬方呎。

劉Sir知道,新地都幾積極喺各個新發展區發展酒店業務,好似將軍澳星峰薈酒店項目租務表現都唔錯,呎租都有約45至54元水平。

至於項目第IIb期以及III期住宅發展計劃則維持不變,第IIb期住宅為遷就IIa期酒店發展,將單位壓縮為平均每伙約247方呎嘅迷你戶,合共大約156伙;第III期就會提供兩幢住宅,共約448個單位。

鄧成波商廈申改酒店

另城規會尋日都收到其他酒店發展申請,好似資深投資者鄧成波嘅長沙灣永康街42A號綽榮商業大廈,就申請改裝現有寫字樓作為酒店用途,提供132間客房;而大坑新村街53至58號亦申請改建做1幢19層高酒店,客房數目約72間。

至於泛海國際(00129)就提出略為修訂元朗屏山住宅項目嘅發展規模,主要係將最近購入位於地盤附近嘅土地納入申請範圍,令地盤面積增約1.08%至約11.1萬方呎,但伙數就減少8伙至935伙。