隻中滔環保（01363）喺兩會之後散晒，技術上已進入超賣區，結果呢兩日彈番啲，尋日升近8%，以接近全日高位4.8元收市，但要企得穩100日線先至可以話係轉勢。

中滔環保提供工業污水處理及供水服務，去年下半年開始做埋污泥處理，全年多賺26.6%至2.2億元。期內每日處理36.5萬立方米污水、供應15萬立方米工業用水、每年處理13.8萬噸污泥，而今年次季永和海滔污水處理設施三期將竣工，加上年底廣佛肇項目投入運作，同埋龍門縣污泥及固體廢物處理設備獲批，總處理能力仲有得加。公司近日取得深圳污泥處理合同，每噸397元人仔，而且主席出手增持200萬股，股價有望回穩。

中滔環保（01363）

阻力位：5.25元

支持位：4.25元