商廈買賣受辣招打擊直插谷底，但又促使一批用家轉買為租，加上「滬港通」應該都吸引唔少上市公司進駐本港。劉Sir知道，美聯商業幾睇好核心區甲級商廈租金走勢，佢話單計首季都按季升咗11.7%，係歷來最勁升幅，仲話上半年閒閒哋都升15至18%咁話。不過，東九龍呢啲供應爆燈嘅非核心區甲廈租金就無咁睇好，上半年睇跌約8至10%。

美聯黃漢成（左二）表示，本港核心區甲級商廈租金將有較佳走勢，料上半年升約15至18%。

市場預期，核心區甲級商廈租金走勢今年可從谷底反彈。（資料圖片）

上半年甲級商廈租售價預測

老友美聯工商舖黃漢成話，根據佢哋嘅統計數字，港島中區呢啲核心區，第一季甲廈租金按季勁升約11.7%，至每方呎約42.8元，季度升幅創埋歷來新高。

滬港通料帶動需求

佢話，其實舊年核心區甲廈租金已經跌至九七年水平，睇怕都可以谷底反彈，因為「滬港通」勢將帶動企業來港上市，咁核心區商廈租務需求大咗，升值潛力都勁啲。

佢估計上半年租金有約15至18%升幅，至於上年半核心區甲廈售價就預計升約5至8%。

反觀東九龍非核心區，就睇得淡啲。黃漢成同劉Sir講，東九龍商業區依家有約100萬方呎空置商廈樓面，部分甲廈呎租都係講緊約23至24元水平，加上嚟緊落成商廈陸續有嚟，供應大增，預計上半年呢類甲廈租金同埋售價，分別有約8至10%，同埋3至5%跌幅。

觀塘商廈現零買賣

佢話，雙倍印花稅嚴重打擊商廈交投，睇番首季只有約203宗註冊，按季勁跌約20.4%，創埋歷來新低，涉及成交金額亦減約20%至約30億元，若相比去年首季註冊量，更加係急瀉約74.7%。不過，佢覺得商廈成交已經跌過籠，估計下半年有機會出現回升。

利嘉閣周滿傑就話，如果按月計，三月份全港商廈買賣登記錄61宗，雖然按月升咗約13%，但都仲係喺極低水平徘徊。分區嚟睇，觀塘商廈買賣表現最失色，三月份出現「零買賣」悶局。至於尖沙咀同埋西營盤呢兩區，商廈買賣都按月跌咗44%同33%，分別錄五及兩宗成交。