本周五復活節假期，歐美市場休市，睇嚟繼續上落市機會比較大，都係繼續留意美匯指數79至81.70，突破呢個維持咗半年的區間先會出現單邊市，到時就要執生。

澳元兌美元走勢

美元弱勢，一眾外幣自然試頂，但真正有條件升的，其實只有新西蘭央行的加息因素。反而歐元最令人不解，炒減息、量寬，甚至周末央行行長德拉吉繼上月後再一次溫馨提示，指歐元再強就會推出寬鬆措施，但歐元抽高後跌幅數十點，明顯市場唔係咁Buy。

不過，事實上歐元再強，的確進一步打壓歐元區通脹，所以仲未有條件大升，1.3950至1.4000仍然係歐洲央行的底線。

逼近0.95阻力區

至於今日澳洲央行亦都會公布最近的議息會議紀錄，令澳元可能成為交易機會所在。預期央行繼續維持中性睇法，即係息口已經見底，不過究竟央行會唔會擔心樓價不斷飆升同埋澳元持續走強，會係今次焦點所在。

上次央行行長同副行長被記者問到匯價過高嘅問題時避而不談，當時匯價約係0.92水平，現價水平已接近筆者心目中的阻力區0.9450至0.9500。雖然澳元未係大跌格局，但小注試沽未嘗不可，可於0.9450試沽澳元，止蝕於0.9550，第一目標先看0.9320，最終目標看0.9250。