基金首季季結前，近排港股資金在各不同類型股份進出頻率明顯加快，去年一直跑贏大市的新經濟板塊，在兩會後見頂回落，醫藥、網絡、手遊及支付股都見拋售潮。反之，資金回流估值低殘的落後股，如受惠於發行優先股融資的內銀及內險，汽車以至煤炭股，都見死貓彈迹象，突竟今次資金大轉移可維持幾耐？

在憧憬業績有機會中短期見底的情況下，達芙妮有一博之道。（資料圖片）

太陽日誌 2014/3/31

美林預測達芙妮業績（港元）

近期有新股上市無耐就發盈警，亦有掛牌後首份業績畀投資者看到資產負債表內，無合理解釋下存貨突然以倍上升，最可惡是協助上市的投行及公司高管，根本是心知肚明，早在招股期間已知悉真相，卻依然隱惡揚善力sell畀客仔，總之一派貨物出門，貴客自理的態度。

新股表現唔精神

以前唔鍾意投資新股，係明知投行精英如雲，太精於將公司盤數催谷得靚靚先至上市，發揮到最高集資效果，接貨者賺錢空間好有限。如今陷阱更係五花八門，港股愈來愈A股化，在下本身已好耐無重點投資新股，最多畀面雞仔注入下飛。

若閣下唔信的話，睇番十月底至今上市的新股，累積跌掉四分之一以上的唔少，中國匯融（01290）、Mega Expo（01360）、雅高礦業（03313）、鴻偉亞洲（08191）、米格國際（01247）以及海昌控股（02255）。當中，錄得3,559倍超購的Magnum Ent（02080）居然都有份，仲有係史提芬都認錯，乳業股中「獨弱」的原生態牧業（01431），上市至今股價累跌逾五成，同期行家現代牧業（01117）跌幅都唔及佢一半，果然是新不如舊。

千頌伊任代言人

《星星》迷或者收到風，達芙妮（00210）簽咗近排熱到爆燈的韓星全智賢出任品牌代言人，以《星星》劇中出現過的植入式廣告，產品全部大賣，呢個宣傳攻勢當然值得期待。不過睇番達芙妮股價，由舊年年初的11元樓上，到上星期一三年業績曝光，全年純利大跌65%至3.29億元，股價隊到3元都守唔住，最低見2.96元，創近四年半新低。

以達芙妮去年每股盈利0.2元，市盈率15.7倍，首季同店銷售跌至低雙位數，差過晒大行預測，但係見大行報告都無再踩多腳，認為是壞消息出盡，而公司亦都向分析員透露三月下旬情況好轉。

去年中央反貪腐，唔單止高級消費品，中價零售所受的衝擊都唔細。以一間業績可能中短期見底，加埋星迷效應，目前達芙妮估值有一博之道。

不過，唔想損失機會成本的捧場客，可以再等多一陣，皆因公司○九年發的5.5億元的人仔可換股債券，今年六月十一日到期，行使價3.08元，以公司手上13.3億元現金，億多元短債，正所謂以小人之心度君子之腹，公司望基金換股的機會唔大，最理想係股價在3至3.5元之間徘徊，等成批債贖番至算。