期指結算日港股反彈，恒指全日升231點，收報22,065點，主板成交726億元。今日係三月最後一個交易日，亦即係第一季季結，估計個市都會好好睇睇頂埋今日，但之後嘅走勢阿莊就唔太樂觀，始終市場缺乏利好消息，加上內地資金緊絀，在缺水之下，要炒起都有難度。

國家電網對智能電錶的採購規模有增無減，威勝生意唔憂做。（資料圖片）

個別股份方面，連續多日急挫的老恒和釀造（02226），上周五反彈超過25%後，在收市前半小時突然拉閘。公司尋日發聲明，澄清主席日前就今年首兩個月收益及全年度盈利增長的預測純屬個人言論，並申請今日復牌。除老恒和外，上周旭光（00067）亦因被沽空機構質疑而仍然在停牌當中，事件難免影響市場信心。

智能電錶需求大

早前熱炒的板塊如手遊、科網及手機概念股等，上星期出現小股災，但威勝集團（03393）股價持續向上，周五更以一支大陽燭突破5.1元呢個強大阻力。表現如此強勁，當然同公司有份靚成績表有關，其截至去年十二月底止全年錄得股東應佔溢利4.01億元（人民幣﹒下同），按年增長24%。

今年以國家電網為代表的各電網公司，將會保持智能電錶的應用規模，估計採購金額達到250億元，計劃新裝同埋更換智能電錶約6,000萬台。另外，國家電網今年資金計劃比起舊年多出30億人仔，主要增長為加大終端、集中器的投資。從多方面的數據顯示，今年威勝的經營環境將繼續理想。

國家電網公司已公布今年智能電錶及數據採集終端第一次統一招標結果，其中威勝奪得約148萬台智能電錶合約，總值約3.26億，排名第一。與此同時，公司亦奪得約24.6萬台數據採集終端和集中器合約，價值約8,446萬元。而截至上周為止，公司今年內已奪得國家電網公司集中招標累計價值約5.02億元合約，今年盈利增長肯定有保證。

以上周五收市價計，威勝往績市盈率只係十倍左右，估值合理，以近日走勢來看，短期好有機會可以升穿一年高位5.5元，並向6元關口進發。