上周初恒指裂口低開，呆咗一日，再連跌三日，結果一周唔見1,121點，收報21,539點，再次失守250日線，10日線一連插穿50日線及250日線，走勢差劣。展望本周，恒指失守上月低位21,197點機會甚大，想撈底千祈咪心急，至少睇埋聯儲局議息結果先至再作打算！

人民幣貶值加上內銀收緊放貸，令內房企業的資金鏈壓力增加。（資料圖片）

魚缸各板塊跌勢頗為全面，一如所料，就連一直走強的國策板塊都現較大幅度的回吐。騰訊（00700）由五十二周高位646元回落至上周五低位僅548元，唔少在高位先至雄心壯志入場掃貨的散戶都睇到眼定定，部分魚缸「清兵」仲一路跌一路溝，話當「平均成本法」買貨，唔使幾耐股價又會創新高云云，阿莊聽落亦覺心寒，惟有祝君好運！

利淡消息不絕

內地利淡消息不絕於耳，首兩月經濟數據欠佳、銀行新增貸款遜預期、人行持續正回購收水、理財產品似在有序爆煲、人行叫停炒得火熱的虛擬信用卡及二維碼支付等。傳統同新興產業均受利淡因素困擾，短期市況易跌難升，偏偏上周滬綜指仍能險守2,000點關收市，報2,004點，但本周能否繼續反地心吸心，實乃疑問。

內銀股短期焦點除咗業績表現外，還有獲批發行優先股的時間表。阿莊認為，雖然目前大部分內銀股市價低於帳面值，內銀可運用發行優先股的資金在二級市場回購股份，但問題係發行優先股都要付利息成本，一來一回未必太着數，除非宏觀因素有明顯改善，否則板塊前景仍未許樂觀。

內房股近期股價明顯受壓，碧桂園（02007）股價由上周三高位4.22元回落至上周五低位僅3.17元，累跌24.9%；中國海外（00688）及華潤置地（01109）現價與五十二周低位亦相距不遠。從資金鏈角度睇，今年內房股面對的環境可能比去年更嚴峻，皆因反貪腐及人仔匯率貶值，已趕退不少熱錢出門，內銀放貸亦已較過往規矩。雖則話，從需求面看，城鎮化有助帶動剛性需求，但針對基層市場，競爭大銀碼細，充其量係薄利多銷，且須建基於就業市場穩定。

若然今年美國退市力度較預期大，雖然內地地方債有阿爺作最大後盾，但私企債市保不了，一旦爆煲，對就業市場必造成衝擊。總體而言，投資者即使在未來一季，眼見內房股極度超賣而想入市博反彈，亦宜盡量避開負債高、專門從事中高端住宅、商用物業又或者二、三線城市的股份，免因小失大。