日本央行議息，基本上無咩睇頭。反而係議息會前幾日的經濟數據，全部都差過預期，去年第四季GDP終值全部向下修訂，最值得關注係企業開支修訂至僅0.8%。

日本四月一日就上調銷售稅，可能連日本央行都答唔到你對經濟的負面衝擊有幾大，大家一直有兩個估計：國內居民打算喺四月一日前趕住消費，令第一季經濟數據有好轉；另央行推QE的日子可能係四月或六月，如果六月先推可能給予足夠時間央行做評估，就算推QE，喺規模上面可以拿捏準確。不過，如果人工無得加，上調銷售稅後或令央行要進一步量寬的壓力愈來愈大。

美元兌日圓於年初自105.40開始調整，現已幾可確認見底回升，阻力區103.50至103.80，只要本周美國聯儲局議息，主席耶倫確認退市步伐未變，一個收水一個放水係今年匯市主題，建議可於101.10水平買入美元兌日圓，後市將挑戰年初高位105.40，止蝕放在100.30。