雖然美股低收，但內地魚缸先跌後回升，支持港股高收，科網股繼續成魚缸焦點，中信21世紀（00241）急升逾三成，冇得估頂。依家騰訊（00700）同阿里巴巴都係當紅企業，唔少公司都主動敲門「提親」，以圖攀龍附鳳帶起身價。但當然，兩家科網巨企無必要「濫交」，相信所覓的合作方都需要喺本身業務領域有過人之處，那合作才能起戰略效果，而唔係純粹炒作。

內地政策提出加快頁岩氣勘採開採及應用，相關股份再掀炒風。（資料圖片）

騰訊股價迭創新高，班投行分析員看風使舵，不斷調高其目標價，最新睇到750元。聽講呢期投行積極向大客推銷騰訊相關Accumulator，由於私人銀行入場銀碼唔細，仲未到拆細去零售市場推銷的階段，仍可放心跟炒。

跟炒網股要識落車

不過，每次泡沫由形成至爆破，過程都有相似地方，相信今次科網熱亦唔例外，到咗缸邊友個個口邊都唔係「QQ」就「阿里」，相關衍生工具炒到甩轆之時，就要懂得開始抽身離場。

環保及新能源股亦係當時得令的板塊，總理報告提及要「鼓勵發展風能、太陽能，開工一批水電、核電項目，加快天然氣、煤層氣、頁岩氣勘探開採及應用」。呢番話字數唔多，卻足夠在魚缸掀炒風。尋日油服股起動，TSC（00206）、華油能源（01251）、宏華（00196）及安東油服（03337）的升幅介乎4至7%。

去年上半年油服股成績遜預期，股價有反彈無升幅，久而久之，蟹貨累積，反彈浪炒風短癮，故跟炒亦要轉身夠快。針對行業發展，阿莊都講過，目前內地開發頁岩氣最缺乏的唔係國策支持，而係技術問題。要加快勘探同開發速度，最便捷方法係引入海外成熟技術，且看今年這方面會否有突破。

安東早前披露今年首季展望時指出，新推出在頁炭氣應用的連續油管技術，在今年首季得到成功推廣及應用，並與四川省宜賓市政府簽署戰略合作框架協議。此外，截至去年底，其未經審核在手合同預計可帶來10億人仔的工作量，業務發展穩定，且看今年在頁岩氣方面的發展，能否帶領股價再闖高峰。

股價自去年五月見高位6.87元後，反覆回落至4元水平見支持。今年初反彈至6.2元後又回落至4.7元水平，支持位上移，目前10日、50日及250日線結集於5.2至5.3元水平，跟炒目標可定在年初高位6.2元，5.2至5.3元不容有失。但補充一句，阿莊對本月中下旬魚缸表現持審慎態度，加上兩會題材可能會隨會議閉幕而冷卻，故追貨宜嚴控注碼，注意風險。