上周英國通脹回落至1.9%，而失業率則由7.1%回升至7.2%，兩個數據令市場炒加息的迫切性減低，成為英鎊回吐藉口。不過，英鎊正處於強勢，回吐幅度有限。

英鎊兑美元走勢

受近日英國惡劣天氣影響，一月份零售銷售又遠差過預期，仲更加大條道理沽英鎊，不過數據公布前匯價係1.6640左右，數據出完後最低跌至1.6610，然後就挾高至1.6725，收市又壓低至1.6620，炒即市極容易左一巴右一巴。

數據一方面可以話係「天氣的錯」，另一方面又睇到非食品同家用品銷售都錄得可觀升幅，睇埋其他方面包括樓市仲喺高位、GDP等環節都仍有支撐，似乎通脹低、零售銷售問題都毋須太擔心。

歐元加元更啱做淡

雖然英鎊兌美元由1.68水平開始調整，不過格局仍然係大漲小回，短線沽英鎊無錯係正路，但大勢向上隨時挾到爆倉，不如等調整完再繼續博英鎊上衝，暫時見到支持區喺1.6480至1.6520，寧可趁低吸博佢回升至1.68甚至挑戰金融海嘯後高位1.70水平，止蝕於1.6400。想要沽，市場上有其他更好更說服到自己的選擇，包括歐元同加元，基本因素點都比英國差。