雙倍印花稅（DSD）實施至今就快一年，喺3D辣招夾擊下，樓市無乜運行。劉Sir知道，DSD推出後約十一個月，二手住宅買賣登記只係得約32,111宗，與對上十一個月相比，跌咗約46.7%。同時，不少大型屋苑樓價表現都麻麻，好似北角城市花園同沙田第一城，DSD實施至今樓價跌咗約8.6%同埋7.5%，最新實用呎價報11,641及10,104元。

雙倍印花稅（DSD）推出迄今快將一年，二手住宅買賣登記大幅滑落。(資料圖片)

DSD後二手樓價下挫個案

老友美聯劉嘉輝同劉Sir講，舊年二月二十三日政府實施雙倍印花稅，樓市受盡3D辣招打壓，搞到二手住宅買賣登記大跌。

逾二千萬樓僅574宗

佢話由舊年四月（反映當時三月市況）開始統計，到今個月截至十七日（反映DSD後市況），喺近十一個月二手住宅只係得約32,111宗買賣登記，相比辣招前十一個月嘅60,227宗，大跌約46.7%。

其中樓價超過2,000萬元嘅豪宅登記，喺呢段時間跌咗52.3%最慘，加埋得574宗；表現叫做無咁差嘅500萬元或以下細價樓，買賣登記都跌咗約46.1%至24,032宗。

過去一年樓價滑落，好似反映樓價走勢嘅中原城市領先指數，喺DSD推出後回落咗4.5%，部分表現比較差。

好似城市花園最新調整建築/實用呎價9,459/11,641元，較DSD實施前跌咗8.6%；沙田第一城都唔好得幾多，建築/實用呎價亦跌約7.5%至8,034/10,104元。

至於紅磡黃埔花園同埋荔枝角美孚新邨等大型屋苑，呎價都跌咗約1.9%至6.1%不等。

中細價盤想旺靠劈價

中細價物業業主近排都肯減價，所以部分屋苑交投回升。

世紀21物業（將軍澳）魏仕良話，將軍澳新都城今個月有10宗成交，比上月同期多咗一倍，主要係業主議價幅度都增加到約5%，最近更連售兩伙，其中2期3座低層E室，就以524.8萬元成交。

香港置業陳偉宗都話，九龍灣德福花園今個月都有9宗成交，已經多過上個月全月嘅5宗。

其中K座高層7室，以約509萬元易手。美聯吳志輝就話，荔枝角美孚新邨今個月都暫錄得12宗成交，而且大部分成交都係最近一周促成。