喺極差的非農數據包裝下，聯儲局主席耶倫千呼萬喚始出來，惟一如預期，都係雷聲大雨點小。

不過，耶倫都有提過新興市場根本影響唔到美國經濟，解釋咗一月聯儲局退市時對新興市場風險雖然隻字不提，但聯儲局暗地裏點會唔留意呢，結果市場即時沽美債買美股，令十年債息又回升至2.7厘而道指都反彈，美元短線有支持。

既然已排除聯儲局加快收水的預期後，短線只會維持縮減100億美元定係減慢收水，相信直至三月耶倫首次主持聯儲局議息會前，市場都會炒作有機會減慢收水而美元難以大升。

上半年強勢貨幣英鎊同紐元自然抽升，進入馬年後立即轉運的澳元，升至短線目標0.9050至0.9080都未見明顯沽壓，想做淡澳元應避避風頭。

尤其澳洲商業信心加強而樓價又高，馬年後數據轉好都令澳元暫時沽唔落手，澳元料仍有空間反彈，支持位在0.883，目標0.9170。